بۇل تۋرالى قوردىڭ ءتوراعاسى بولات جامىشيەۆ اقوردادا ايتتى، دەپ حابارلايدى قازاقپارات.
ايتا كەتەيىك، بۇگىن مەملەكەت باسشىسى قاسىم-جومارت توقايەۆ «قازاقستان حالقىنا» قورىنىڭ ءتوراعاسى بولات جامىشيەۆتى قابىلدادى.
«قازىرگى ۋاقىتتا قور 10 جوبانى جۇزەگە اسىرىپ جاتىر. نەگىزىنەن بۇل مەديتسينا سالاسىنداعى جوبالار، سونداي-اق ەرەكشە بالالاردى الەۋمەتتىك وڭالتۋ، مەديتسينالىق وڭالتۋ، اۋىل مەكتەپتەرىندەگى ءبىلىم دەڭگەيىن كوتەرۋگە قاتىستى جوبالار بار. ارنايى مەكتەپتەردى جابدىقتاۋ بويىنشا دا شارالار اتقارىلادى. قازاقستاندا 98 ارنايى مەكتەپ بار، ولاردىڭ ءبارى قايتا جابدىقتاۋعا مۇقتاج. ءبىز سيرەك كەزدەسەتىن اۋرۋلارمەن اۋىراتىن بالالاردى ءدارى-دارمەكپەن قامتۋ باعىتىندا دا جۇمىس ىستەپ جاتىرمىز. بۇدان دا باسقا جوبالار تۋرالى پرەزيدەنتكە باياندادىم»، - دەدى بولات جامىشيەۆ اقوردادا بەرگەن سۇحباتىندا.
ونىڭ ايتۋىنشا، پرەزيدەنت قوردىڭ تۇجىرىمداماسىن قالىڭ كوپشىلىكپەن تاعى ءبىر تالقىلاۋ قاجەتتىگىن ۇسىنعان.
«مەنىڭ ويىمشا، بۇل بۇگىنگى كۇننىڭ وزەكتى مىندەتى. ءالى دە قور جۇمىس ىستەۋى قاجەت ءبىرقاتار باعىت بار ەكەنى انىق. بۇل باعىتتار ازاماتتىق قوعام وكىلدەرىمەن، «قازاقستان حالقىنا» قورىنىڭ دونورلارى بولعان مەملەكەتتىك ورگانداردىڭ وكىلدەرىمەن بىرگە ايقىندالسا جاقسى بولار ەدى. ءبىز قىركۇيەك ايىنىڭ باسىندا وسى قۇرىلىمداردىڭ وكىلدەرىمەن ۇلكەن ونلاين كونفەرەنتسيا وتكىزەمىز»، - دەدى بولات جامىشيەۆ.