مەملەكەت باسشىسى قاسىم- جومارت توقايەۆتىڭ توراعالىعىمەن قازاقستاندا كوروناۆيرۋس ينفەكتسياسىنىڭ تارالۋىنا جول بەرمەۋ ماسەلەلەرى جونىندە كەڭەستە دەنسالىق ساقتاۋ ءمينيسترى الەكسەي سوي ەلدەگى سانيتارلىق- ەپيدەميولوگيالىق جاعداي مەن قابىلدانىپ جاتقان شارالار تۋرالى باياندادى. ءمينيستردىڭ ايتۋىنشا، 1-قىركۇيەكتەن 16-قاراشاعا دەيىن قازاقستاندا 986 وقۋشى كۆي جۇقتىرعان، كەزەكشى سىنىپتاردا وقيتىن بالالار اراسىندا 288 جاعداي تىركەلگەن. بايلانىستا بولعان 3122 ادام انىقتالدى، ولاردىڭ 33 ءى ىندەت جۇقتىرعان.
«ونلاين وقيتىن وقۋشىلار اراسىنداعى سىرقات دەڭگەيى جوعارى - 698 بالا. وقۋ جىلىنىڭ باسىندا قالىپتى رەجيمدە وقۋعا شەكتەۋ قويىلدى، سونىڭ ارقاسىندا 6 مىڭنان استام بالانىڭ ىندەت جۇقتىرعان وقۋشىلارمەن بايلانىسىن جانە 600 جۋىق كوروناۆيرۋس ينفەكتسياسى جاعدايىنىڭ الدىن الدىق»، - دەدى ا. سوي.