اقتوبە فەررو قورىتپا زاۋىتى ءونىمىنىڭ 97 پايىزىن الەمنىڭ 40 ەلىنە ەكسپورتتايدى
شىعارىلاتىن ءونىمنىڭ ساپاسى حالىقارالىق تالاپتارعا ساي بولعاندىقتان، سۇرانىس ازايماعان. سوندىقتان ءونىم كولەمىن ازايتۋ ماسەلەسى دە تۋىندامايدى.
جارتى عاسىردان استام تاريحى بار الىپ زاۋىتتا جىلىنا 100 مىڭ توننا حروم وڭدەلەدى. ءانۋار قوبدابايەۆ بالقىتۋشى بولىپ جۇمىس ىستەيدى. مەتاللۋرگ ماماندىعى قاجىرلىقتى قاجەت ەتەدى، - دەيدى جاس مامان. جۇمىسى تۇراقتى، جالاقىسى ۋاقىتىلى. كاسىپورىن الەۋمەتتىك قولداۋ كورسەتەدى، مەديتسينالىق ساقتاندىرۋ، ساۋىقتىرۋ شارالارى ءبارى قاراستىرىعان.
«جۇمىس ۇنايدى، بۇل جۇمىسقا شىدامدىلىق كەرەك ءبىرىنشى تالاپ، مىنەز كەرەك. ىستىق پروتسەسستەر بولعاندىقتان، جۇمىس وڭايعا تيمەيدى، ناعىز ەر جىگىت بولۋى كەرەك بۇل جۇمىستا»، - دەيدى زاۋىت بالقىتۋشىسى ءانۋار قوبدابايەۆ.
زاۋىتتا حروم قوسىندىلارىنىڭ 6 ءتۇرى شىعارىلادى. دايىن ءونىمنىڭ 97 پايىزى الەمنىڭ 40 تان استام ەلىنە ەكسپورتتالادى. فرانسيا، جاپونيا، ا ق ش جانە يتاليا سىندى مەملەكەتتەرمەن تۇراقتى ارىپتەستىك قارىم- قاتىناس ورناتقان. كاسىپورىندا جىل سايىن جاڭا جوبالار ىسكە اسىرىلۋدا. مىسالى بيىل №2 سەحتا جاڭا پەشكونۆەيەر ورناتىلدى. وسىنىڭ ءبارى ەكسپورتتىڭ الەۋەتىن ارتتىرۋعا مۇمكىندىك بەرەدى.
«ۇلتتىق ۆاليۋتانىڭ ەركىن اينالىمعا جىبەرىلۋى قاجەتتىلىكتەن تۋىنداعان شارا دەپ ويلامىن. ناقتى ءبىزدىڭ وندىرىسكە ءبىراز مۇمكىندىك بەرىپ وتىر. مىسالى فەرروحروم ءونىمى باسەكەگە قابىلەتتى بولادى. ءونىم وتسە، كىرىس تە كوبەيەدى. جۇمىس ورىندارى ساقتالادى، تۇراقتىلىق بولادى»، - دەدى زاۋىتتىڭ كاسىپوداقتار ۇيىمىنىڭ ءتوراعاسى باقتىكەرەي قابانوۆ.
زاۋىتتا ىسكە اسىرىلعان بالاماسى جوق جوبا - № 4-سەحتىڭ سالىنۋى. مەتاللۋرگتەر سەح دەگەنمەن، بۇل تولىقتاي اۆتوماتتاندىرىلعان ءوز الدىنا دەربەس زاۋىت سانالادى. مۇندا جىلىنا 440 مىڭ توننا فەرروحوم ءوندىرىلىپ، ەكسپورتقا شىعارىلادى.