قازاقستان رەسەيدەن ا ي-95 بەنزينىن يمپورتتاۋعا ءماجبۇر

استانا. قازاقپارات - ەنەرگەتيكا ءمينيسترى الماسادام ساتقاليەۆ ۇكىمەت وتىرىسىنان كەيىن ب ا ق وكىلدەرىنە بەرگەن سۇحباتىندا ەلدەگى جانارماي قورىنىڭ ناقتى كولەمىن اتادى، دەپ حابارلايدى قازاقپارات ءتىلشىسى.

«بۇگىنگى ساعات 9.00-دەگى جاعداي بويىنشا بىزدە ا ي-92 ماركالى بەنزيننىڭ قورى 23 كۇنگە جەتەدى. ا ي-95 ماركالى بەنزيننىڭ قورى - 15 كۇنگە، ديزەلدىڭ قورى 29 كۇنگە جەتەدى»، - دەدى ۆەدومستۆو باسشىسى.

مينيستر جانارماي تاپشىلىعى تۋىنداعان جاعدايدا ونىڭ باعاسىن قولدان قىمباتتاتۋ، الىپ- ساتۋ ارەكەتتەرى جيىلەيتىنىن ەسكە سالىپ، بۇل باعىتتا ءتيىستى شارالار قابىلدانىپ جاتقانىن اتاپ ءوتتى.

«ا ي-95 ماركالى بەنزيننەن باسقا قانداي دا ءبىر جانارمايدىڭ باعاسىنىڭ كۇرت ءوسۋىن بولدىرمايمىز دەپ ويلايمىن. ويتكەنى ونى رەسەيدەن يمپورتتاۋعا تۋرا كەلەدى. قازىر اي-95 ماركالى بەنزيننىڭ قورى 15 تاۋلىككە جەتەدى. پاۆلودار مۇناي زاۋىتىنداعى جوندەۋ جۇمىستارىنا بايلانىستى، اتىراۋ مۇناي وڭدەۋ زاۋىتىنداعى اقاۋعا بايلانىستى، شىمكەنت زاۋىتىنىڭ ا ي-95 ماركالى بەنزيننىڭ ءوندىرىس كولەمىن ازايتۋىنا بايلانىستى نارىق قاجەتتىلىگىن رەسەي فەدەراتسياسىنان الدىراتىن يمپورت ارقىلى عانا تولىق جابامىز دەپ كۇتىپ وتىرمىز. رەسەيمەن ءتيىستى كەلىسسوز جۇرگىزىپ جاتىرمىز. بىزگە شامامەن 40 مىڭ تونناداي اي-95 ماركالى بەنزين يمپورتتاۋ قاجەت. كەلىسسوز ءجۇرىپ جاتىر. قازىر «گازپروم نەفت» جەتكىزە باستادى»، - دەدى الماسادام ساتقاليەۆ.

ەسكە سالايىق، بىرەر كۇن بۇرىن ەنەرگەتيكا مينيسترلىگى قازاقستاننىڭ ءىرى جانار- جاعارماي قۇيۋ بەكەتتەرى رەسەيدەن بەنزين يمپورتتاۋ ماسەلەسىن پىسىقتاپ جاتقانىن مالىمدەگەن بولاتىن.