تۇركى اكادەمياسىندا تۇركيا رەسپۋبليكاسىنىڭ 95 جىلدىعى اتاپ ءوتىلدى
مەرەكەلىك شاراعا ءبىرقاتار مەملەكەتتەردىڭ ەلشىلەرى، TWESCO- عا قۇرىلتايشى ەلدەردىڭ وكىلدەرى، تۇركولوگتار قاتىستى.
«تۇركيا حالقىن بۇگىنگى ۇلتتىق مەرەكەسىمەن، رەسپۋبليكا كۇنىمەن قۇتتىقتايمىن. كەزىندە مۇستافا شوقاي تۇركياعا بارعاندا ءوز ماقالاسىندا «تۇركى كىندىگىنەن تاراعان ءاربىر ازاماتتىڭ ەكى وتانى بار، ونىڭ ءبىرى - كىندىك قانى تامعان تۋعان جەرى بولسا، ەكىنشى وتانى - تۇركيا» دەپ جازعان ەكەن. شىن مانىندە قۇرىلعانىنا 95 جىل تولىپ وتىرعان تۇركيا رەسپۋبليكاسى ءاربىر تۇركى ناسىلىنەن تۋعان ازاماتتىڭ ەكىنشى وتانى ىسپەتتى قىزمەت اتقاردى. ءبىزدىڭ حالىقارالىق تۇركى اكادەمياسىنىڭ قۇرىلتايشىلارىنىڭ ءبىرى»، - دەدى حالىقارالىق تۇركى اكادەمياسىنىڭ پرەزيدەنتى دارحان قىدىرالى ءوزىنىڭ قۇتتىقتاۋ سوزىندە.
سونىمەن بىرگە، اكادەميا باسشىسى جاقىندا ماڭىزدى شەشىم قابىلداعاندارىن جەتكىزدى.
«اكادەميانىڭ قۇرىلتايشى مەملەكەتتەرىنىڭ بارلىق مەملەكەتتىك مەرەكەلەرى مەن اتاۋلى كۇندەرىن تۇركى اكادەمياسىندا جوعارى دەڭگەيدە اتاپ ءوتۋدى ۇيعاردىق»، - دەدى دارحان قىدىرالى.
ءوز كەزەگىندە تۇركيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى نيەۆزات ۋيانىك قازاقستان جۇرتشىلىعى مەن حالىقارالىق تۇركى اكادەمياسىنا العىس ءبىلدىردى.
«اتاجۇرتىمىز قازاقستاندا رەسپۋبليكا كۇنىمىزدى تويلاۋ ءبىز ءۇشىن ماقتانىش. تۇركيا رەسپۋبليكاسى ءبىرىنشى دۇنيەجۇزىلىك سوعىستان كەيىن وسمان يمپەرياسىنىڭ قۇلدىراۋىمەن قۇرىلعان بولاتىن. باۋىرلاس قازاقستاننىڭ استاناسىندا، حالىقارالىق تۇركى اكادەميسياسىندا باس قوسقانىمىزعا قۋانىشتىمىن. بۇگىنگى مەرەكە تۇركيادا دا سالتاناتتى تۇردە تويلانىپ جاتىر. ەكى ەل اراسىندا باۋىرلاستىق پەن دوستىق، اسىرەسە مەملەكەت باسشىلارى اراسىنداعى جىلى قارىم-قاتىناس دوستىعىمىزدىڭ ودان ءارى دامۋىنا اسەر ەتىپ جاتىر. تاۋەلسىزدىگىمىز، دوستىعىمىز جانە باۋىرلاستىعىمىز ماڭگىلىك بولعاي»، - دەدى تۇركيا ەلشىسى.
سونىمەن بىرگە، شاراعا كەلگەن ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد مامەدوۆ جانە موڭعوليانىڭ قازاقستانداعى توتەنشە جانە وكىلەتتى ەلشىسى لۋۆسان باتتۋلگا تۇركيا ەلشىسىن قۇتتىقتاپ، ءوز لەبىزدەرىن ءبىلدىردى.
ايتا كەتەيىك، 1920-جىلى 23- ساۋىردە گرەك-تۇرىك سوعىسى كەزىندە قۇرىلعان ۇلى ۇلتتىق جينالىس تۇركيانى رەسپۋبليكا رەتىندە جاريالاعان بولاتىن. الايدا، رەسپۋبليكا 1923-جىلدىڭ 29- قازانىندا عانا رەسمي تۇردە مويىندالدى.
تۇركيا - وڭتۇستىك-شىعىس ەۋروپا مەن وڭتۇستىك-باتىس ازيادا ورنالاسقان مەملەكەت. سولتۇستىك-باتىسىندا بولگاريا، گرەكيامەن، سولتۇستىك-شىعىسىندا گرۋزيا، ارمەنيامەن، شىعىسىندا يرانمەن، وڭتۇستىگىندە يراك، سيريامەن، سونداي-اق سولتۇستىگىندە قارا تەڭىزبەن، سولتۇستىك-باتىسىندا ءمارمار تەڭىزىمەن، وڭتۇستىگىندە جەرورتا تەڭىزىمەن، باتىسىندا ەگەي تەڭىزىمەن شەكتەسەدى.