جۋرناليست ك. توقايەۆتىڭ 95 جىلدىعىنا وراي الماتىدا عىلىمي شارا ءوتتى
جاۋىنگەر، جازۋشى ءارى جۋرناليست كەمەل توقايەۆتى ەسكە الۋ شاراسى ءال- فارابي اتىنداعى قازاق ۇلتتىق ۋنيۆەرسيتەتىندە باستالدى. جيىندا عالىمدار مەن جازۋشىلار قازاق ادەبيەتىندەگى دەتەكتيۆ جانرىنىڭ نەگىزىن قالاعان قالامگەردىڭ ءومىرى مەن شىعارماشىلىعى تۋرالى ايتتى. كەمەل توقايەۆتىڭ دەرەكتى شىعارمالار جازۋىنا ءوزى كۋا بولعان ەكىنشى دۇنيەجۇزىلىك سوعىستاعى وقيعالار تۇرتكى بولعان.
رافاەل نيازبەك، جازۋشى:
- بۇل دەتەكتيۆ جانرى بۇرىن قازاق توپىراعىندا بولماعان. ونىڭ بۇكىل شىعارماسى - دەتەكتيۆ. شەبەرلىگى، وقيعانى تۇتقيىلدان باستايدى. كەمەل توقايەۆ 1923 -جىلى الماتى وبلىسىنىڭ قاراتال اۋدانىندا دۇنيەگە كەلىپ، ەلىمىزدەگى ىرگەلى باسىلىمداردا جاۋاپتى قىزمەت اتقاردى. وي ۇشقىرلىعى، قالام قۋاتى، جازۋشىلىق كورەگەندىگىنەن تۋعان ءار شىعارماسى بۋىرقانعان وقيعالارعا تولى بولدى. ءوز كەزەڭىندە جازۋشى شىعارمالارى 450 مىڭ تيراجبەن باسىلعان.
سەيىت قاسقاباسوۆ، اكادەميك:
- سول كەزدە بەردىبەك سوقپاقبايەۆ پەن كەمەل اعانىڭ شىعارمالارى بىزدەرگە قىزىق بولاتىن. كەمەل اعا الاپات جىلدارى ءومىر سۇرگەن. قاسىرەتكە تولى عاسىر. ۇلى جەڭىستەرگە جەتكەن عاسىر. قىجىعى مەن شىشىعى باستان اساتىن عاسىر.
جازۋشىنىڭ «كومەسكى ءىز»، «تاسقىن»، «تۇندە اتىلعان وق» سىندى شىعارمالارى وقىرمان جۇرەگىنەن ورىن الدى. سونداي- اق «سولدات الىسقا كەتتى»، «سوڭعى سوققى» سەكىلدى روماندارى قازاق ادەبيەتىنىڭ التىن قورىنا ەنگەن.
www.24.kz