ەكسپو-دان كەيىن قالاداعى 95 حوستەلدىڭ 33 ى جابىلىپ قالدى
الايدا ارزان قوناقجايدىڭ بۇل تۇرىنە سۇرانىس جوقتىڭ قاسى. سوڭعى جارتى جىلدا استانادا 33 حوستەل جابىلىپ قالدى، دەپ حابارلايدى قازاقپارات ەلوردا ينفو سايتىنا سىلتەمە جاساپ.
ەكسپو كورمەسىنە دايىندىق بارىسىندا قالادا 95 حوستەل جۇمىس ىستەگەن بولاتىن. قازىر ونىڭ 62 سى عانا جۇمىس ىستەپ تۇر.
«بۇگىنگى كۇنى ەلوردادا 62 حوستەل بار. وندا تۇرۋ اقىسى ورتا ەسەپپەن 2500 تەڭگەنى قۇرايدى. ماۋسىمعا بايلانىستى باعا وزگەرىپ وتىرادى»، - دەلىنگەن «استانا كونۆەنشن بيۋرو» ۇسىنعان اقپاراتتا.
بەلگىلى بولعانداي، حوستەلدەر ىسكەرلىك جانە جاستارعا ارنالعان بولىپ بولىنەدى. استاناداعى كورمە اياقتالعان سوڭ قالاداعى حوستەلدەر نارىقتا ورنىن ساقتاپ قالۋ ءۇشىن ءتۇرلى قادامدارعا باردى. ءبىرى باعاسىن ارزانداتسا، ەندى ءبىرى ستۋدەنتتەرگە ۇزاقمەرزىمدى جالعا بەرۋ ءۇشىن ارنايى جەڭىلدىكتەر جاسادى.
«بۇگىندە قالاداعى حوستەلدەردىڭ باسىم بولىگى جاتىن ورىندى ۇزاقمەرزىمدى جالعا بەرۋ ەسەبىنەن كۇن كورىپ وتىر. حوستەل تۇرعىندارىنىڭ نەگىزگى بولىگى جاستار. سونىمەن بىرگە، سوڭعى ۋاقىتتا ورتا جاستاعى ازاماتتاردىڭ سانى ارتىپ كەلە جاتقانىن كورىپ وتىرمىز»، - دەلىنگەن اقپاراتتا.
ال «ەسىل» حوستەلىنىڭ باسشىسى ايناش احمەتوۆا بۇل سالادا پايدا تابۋعا بولاتىنىن ايتادى. تەك، ول ءۇشىن حوستەل ورنالاساتىن پاتەر وزىڭدىكى بولۋى ءتيىس. ول ءوزىنىڭ ءتورت بولمەلى پاتەرىن حوستەلگە اينالدىرعان.
«مەن وسى قىسقا ۋاقىت ىشىندە ازدى- كوپتى پايدا تاپتىم. سەبەبى، بۇل مەنىڭ ءوزىمنىڭ پاتەرىم. ياعني پاتەر جالداۋعا اقشا شىعىندامايمىن. سونىمەن قاتار تازالىق جۇمىسىمەن، كىر جۋۋ سياقتى جۇمىستاردى ءوزىم ىستەيمىن. ادام جالداپ ولارعا جالاقى تولەۋگە اقشا شىعىندامايمىن»، - دەدى احمەتوۆا.
ال «The rooms» حوستەلىنىڭ جەتەكشىسى گۇلجان كەنجەعاليەۆانىڭ ايتۋىنشا، حوستەلدىڭ تابىسىنا ورنالاسقان جەرى اسەر ەتەدى.
«مەن ەكسپو كورمەسى قارساڭىندا تابىس تابامىن دەگەن ماقساتپەن حوستەل اشتىم. الايدا تاپقانىم شامالى. ءتورت اي ىشىندە بىزدە بار- جوعى 200-گە جۋىق ادام بولدى. مەنىڭشە جۇمىستىڭ ءجۇرۋى حوستەلدىڭ ورنالاسقان جەرىنە بايلانىستى. سەبەبى، مەنىڭ حوستەلىم قالانىڭ سول جاعالاۋىندا بولعانىمەن ورتالىقتان جەتۋ قيىن. جۇمىس جۇرمەي، پايدا اكەلمەگەن سوڭ، ونى جابۋعا تۋرالى كەلدى. ەڭ باستىسى - سونى اشۋعا قارىزعا العان اقشامدى ءالى كۇنگە دەيىن قايتارمادىم»، - دەدى كەنجەعاليەۆا.
فوتو: elorda.info