اتىراۋدا مەملەكەتتىك تۋدى 91 مەتر بيىكتىككە كوتەرەدى - فوتو
بيىل سونداي-اق يساتاي- ماحامبەت الاڭىن قايتا جاڭعىرتۋ جۇمىسى باستالادى. بۇل تۋرالى بۇگىن، 21 اقپاندا حالىققا ەسەپ بەرۋ جيىنىندا اتىراۋ وبلىسىنىڭ اكىمى نۇرلان نوعايەۆ ايتتى، دەپ حابارلايدى قازاقپارات.
بولاشاق نىساننىڭ كولەمى اجەپتاۋىر. الاڭى 57 شارشى مەتر، ءتۋتۇعىردىڭ بيىكتىگى 91 م. 112 شارشى مەتر جاڭا الاڭعا ورناتىلعان 91 مەتر بيىكتىكتەگى مەملەكەتتىك تۋ وبلىس ورتالىعىنىڭ كەز كەلگەن نۇكتەسىنەن انىق كورىنەتىن بولادى. جوبادا قۇرىلىستىڭ ەكى جاعىندا ورنالاساتىن ەكى سۋبۇرقاق قاراستىرىلعان. تۋتۇعىر قالاداعى ەڭ بيىك قۇرىلىس بولادى. نۇرلان نوعايەۆ 2018 -جىلى يساتاي- ماحامبەت الاڭىن قايتا جاڭعىرۋ باستالاتىنىن دا ايتتى.
جوبالاۋ- سمەتالىق قۇجاتتاماعا سايكەس بەلگىلەنگەن اۋماققا ەكى كولەمدى ساۋلەت كومپوزيتسياسى، ۇلكەن جانە كىشى سۋبۇرقاقتار، باسسەين، ورىندىقتارى بار پەرگولالار ورناتىلادى. الاڭنىڭ باستى اشەكەيى كوبىكتى سۋبۇرقاق قوندىرىلعان باسسەينى بار ءمارمار دومبىرا تۇرىندەگى ساۋلەت كومپوزيتسياسى بولادى دەپ جوسپارلانىپ وتىر.
قالپىنا كەلتىرۋ جۇمىستارى اياقتالعاننان كەيىن اتىراۋ قالاسىنىڭ باستى الاڭى جارىقتانا، جاسىلدانا تۇسەدى - اۋماقتا گۇلزارلار، جاسىل ءشوپتى كوگالدار، كوپتەگەن جاسىل جەلەكتەر بولادى. قالا تۇرعىندارى مەن قوناقتارى ءتورت ساندىك شاتىر استىندا دەمالا الادى.
ەكى جوبا دا جەر قويناۋىن پايدالانۋشىلاردىڭ الەۋمەتتىك اۋدارىمدارى ەسەبىنەن قارجىلاندىرىلادى.
«مەملەكەت باسشىسىنىڭ تاپسىرماسىنا سايكەس جانگەلدين مەن قۇلمانوۆ كوشەلەرىنىڭ قيىلىسىنداعى پايدالانىلماعان جەردى قايتاردىق. مۇندا قازاقستاننىڭ تاۋەلسىزدىك جىلدارىنداعى جەتىستىكتەرىن ايشىقتايتىن تۋتۇعىرى بار جاڭا الاڭ سالىنادى»، - دەدى نۇرلان نوعايەۆ.
الاڭدى قالپىنا كەلتىرۋ ءوز كەزەگىندە مۇنايلى استانانىڭ كەلبەتىنە كورىك قوسىپ، اتىراۋدىڭ بارلىق كوركەمدىگىن كورسەتەدى.