قازاقستان گەرمانياعا 90 مىڭ تونناعا جۋىق مۇناي جونەلتتى

استانا. قازاقپارات - قازاقستان گەرمانياعا 90 مىڭ تونناعا جۋىق مۇناي جونەلتتى. كەلىسىمدەرگە سايكەس اتالعان كولەم ۇلعايادى. بۇل تۋرالى ەنەرگەتيكا ءمينيسترى الماسادام ساتقاليەۆ مالىمدەدى، دەپ حابارلايدى قازاقپارات ءتىلشىسى.

«بىزدە باكۋ- تبيليسي- دجەيحان مۇناي قۇبىرىمەن قازاقستان مۇنايىن ەكسپورتتاۋ بويىنشا ۋاعدالاستىقتار ورناعان. باكۋ- سۋپسا باعىتى بويىنشا مۇناي تاسىمالداۋ مۇمكىندىكتەرى ايتىلىپ جاتىر. سونداي- اق، ءبىز بۇقارالىق اقپارات قۇرالدارىنا قازاقستاننىڭ گەرمانياعا «درۋجبا» قۇبىرى ارقىلى مۇناي جەتكىزۋدى باستاعانىن ايتقان بولاتىنبىز»، - دەدى الماسادام ساتقالييەۆ ۇكىمەت كۋلۋارىندا.

ايتا كەتەيىك، بۇل جەتكىزىلىمدەر قازاقستاندىق مۇنايدىڭ ترانزيتى تۋرالى بۇرىن جاسالعان شارتتارعا سايكەس جۇرگىزىلىپ جاتىر.

«قازاقستاندىق كومىرسۋتەك شيكىزاتىنىڭ كولەمى حالىقارالىق شارتتار شەڭبەرىندە جۇزەگە اسىرىلادى. پيلوتتىق كولەم، شامامەن 90 مىڭ تونناسى جونەلتىلدى. كەلىسىمدەرگە سايكەس، بۇل كولەم ۇلعايادى»، - دەدى مينيستر.