پوليتسيا قىزمەتكەرلەرىنىڭ 90 پايىزدان استامى ۆاكسينا الدى
بۇل جايىندا ق ر ىشكى ىستەر مينيسترلىگىنىڭ رەسمي وكىلى نۇردىلدا وراز ءمالىم ەتتى، دەپ حابارلايدى قازاقپارات ءتىلشىسى.
«پوليتسەيلەر مەن قىلمىستىق- اتقارۋ جۇيەسى قىزمەتكەرلەرىنىڭ 90 پايىزداندان استامى COVID-19-عا قارسى جوسپارلى ۆاكسيناتسيادان ءوتتى. مينيستر ەرلان تۇرعىمبايەۆ باستاعان ءىىم باسشىلىعى دا ۆاكسينا الدى. ەلىمىزدىڭ باس پوليتسەيىنىڭ ايتۋىنشا، جەكە قۇرامدى ۆاكسيناتسيالاۋ وسى جىلدىڭ 6-ناۋرىزىنان باستاپ جۇرگىزىلۋدە جانە ىشكى ىستەر ورگاندارىنىڭ بارلىق فۋنكسيونالدىق جانە اۋماقتىق بولىمشەلەرىن، ونىڭ ىشىندە قىلمىستىق- اتقارۋ جۇيەسىنىڭ ۇيىمدارىن، ىشكى اسكەرلەر مەن ءىىم وقۋ ورىندارىن قامتىدى»، - دەدى ول ىشكى ىستەر مينيسترلىگىنىڭ باسپا ءسوز قىزمەتى الاڭىندا وتكەن بريفينگ بارىسىندا.
ونىڭ اتاپ وتۋىنشە، پوليتسيا قىزمەتكەرلەرى قىلمىستاردى اشۋ جانە تەرگەۋ، وقيعا ورىندارىن تەكسەرۋ، تەرگەۋ ارەكەتتەرىن جۇرگىزۋ بويىنشا قىزمەت اتقارادى، جولدارداعى قاۋىپسىزدىكتى قامتاماسىز ەتەدى، سونداي-اق سانيتارلىق بەكەتتەردە قىزمەت ەتەدى. بۇدان باسقا، مەديتسينا قىزمەتكەرلەرىمەن بىرگە كارانتيندىك شارالاردى قامتاماسىز ەتۋگە قاتىسادى. سوندىقتان COVID-19 جۇقتىرۋ قاۋپى بار.