نۇر -سۇلتان. قازاقپارات - تۇركيانىڭ يزمير قالاسىنداعى جەر سىلكىنىسى كەزىندە ءۇيىندى استىندا ءتورت كۇن بويى جاتقان ءۇش جاسار قىز قۇتقارىلدى، - دەپ حابارلايدى «انادولۋ».
ايدا گەزگين ەسىمدى قىز ءۇيىندى استىندا 90 ساعاتتان اسا ۋاقىت جاتقان. ول كىر جۋعىش ماشينانىڭ جانىندا قىستىرىلىپ قالعان.
«الدىمەن مەن ونىڭ داۋسىن ەستىدىم دە باسقا قۇتقارۋشىلارعا حابارلادىم. وعان جاقىنداي كەلە ەسىمىن سۇراپ، قول بۇلعاۋىن ءوتىندىم. ول قولىن كوتەردى»، - دەيدى نۋسرەت اكسوي ەسىمدى قۇتقارۋشى.
ايدا - يزميردە ءۇيىندى استىنان قۇتقارىلعان 109-شى ادام. دارىگەردىڭ ايتۋىنشا، ونىڭ جاعدايى قاناعاتتانارلىق.
«ايدا ءوزىن جاقسى سەزىنەدى، قازىر وعان توموگرافيا جاسالادى. ءۇيىندى استىندا قالىپ قويعان اناسىن ءالى دە ىزدەستىرىپ جاتىرمىز. قۇتقارۋشىلاردىڭ ايتۋىنشا، ول ايدا جاتقان ماڭايدا بولۋى مۇمكىن. وقيعا اناسى جۋىنۋ بولمەسىندە جۇرگەن كەزدە بولعان سياقتى. ەكى ساعاتتان كەيىن ولارعا حابارلاسا العانىمىزبەن ارتىنشا ۇيالى تەلەفونى ءسونىپ قالدى»، - دەيدى ايدانىڭ اعاسى انىل دجاندان.
ەسكە سالايىق، 30-قازاندا تۇركيادا 6.6 بالدىق جەر سىلكىنىسى بولعان. ەپيتسەنتر - يزمير پروۆينسياسىنىڭ سەفەريحيسار قالاسى. سوڭعى مالىمەتتەر بويىنشا، تابيعي اپات سالدارىنان 76 ادام قازا تاپقان. كوپتەگەن ادام باسپاناسىز قالعان. جەر سىلكىنىسى سالدارىنان يزميردەگى 20 دان اسا عيمارات زارداپ شەككەن.