«كوروناۆيرۋستىڭ الەمدىك ەكونوميكاعا قالاي كەرى ىقپال ەتكەنىن كوردىك. ءىس جۇزىندە بۇكىل الەمدىك ەكونوميكالىق جۇيەنى قايتا جاڭعىرتۋ ماسەلەسى قويىلىپ وتىر. قازاقستان دا وسى اۋقىمدى داعدارىستىڭ سالدارىن سەزىنۋدە»، - دەدى مەملەكەت باسشىسى تەلەارنالار ارقىلى جولداعان ۇندەۋىندە.
ونىڭ ايتۋىنشا، ەكونوميكالىق كاتاكليزمدەرگە قاراماستان، الەۋمەتتىك شيەلەنىس پەن جۇمىسسىزدىقتىڭ ارتۋىنا جول بەرمەس ءۇشىن بارلىق شارالار قولدانىلادى.
«ەلباسى نۇرسۇلتان نازاربايەۆتىڭ سارابدال ساياساتىنىڭ ارقاسىندا ەلىمىزدىڭ حالىقارالىق رەزەرۆتەرى شامامەن 90 ميلليارد دوللارعا جەتتى. بۇل - ەكونوميكامىزدىڭ تۇراقتىلىعىن ساقتاۋدىڭ جانە مەملەكەتتىڭ الەۋمەتتىك مىندەتتەمەلەرىن ورىنداۋدىڭ ماڭىزدى كەپىلى. ءبىز بيۋدجەتتىك شىعىنداردى ماكسيمالدى ءتيىمدى بولاتىن باعىتتارعا قايتا بۇرامىز. وتاندىق كاسىپكەرلەردى قولداۋعا جانە جاڭا جۇمىس ورىندارىن قۇرۋعا كەم دەگەندە 300 ميلليارد تەڭگە بولىنەدى»، - دەدى ق. توقايەۆ.
ەستەرىڭىزگە سالا كەتسەك، ق ر پرەزيدەنتىنىڭ جارلىعىمەن دۇنيەجۇزىلىك دەنساۋلىق ساقتاۋ ۇيىمىنىڭ جاڭا COVID-19 كوروناۆيرۋسىن پاندەميا دەپ جاريالاۋىنا بايلانىستى ازاماتتاردىڭ ءومىرى مەن دەنساۋلىعىن قورعاۋ ماقساتىندا قازاقستان رەسپۋبليكاسىنىڭ بارلىق اۋماعىندا 2020 -جىلعى 16 - ناۋرىز 08 ساعات 00 مينۋت پەن 2020 -جىلعى 15 - ءساۋىر 07 ساعات 00 مينۋت ارالىعىندا توتەنشە جاعداي ەنگىزىلدى.
سونداي- اق قازاقستان ازاماتتارىنا 15 - ساۋىرگە دەيىن ەل اۋماعىنان شىعۋعا تىيىم سالىندى.
قازاقستان پرەزيدەنتى وتاندىق كاسىپكەرلەردى قولداۋعا جانە جاڭا جۇمىس ورىندارىن قۇرۋعا ەڭ كەمى 300 ميلليارد تەڭگە بولىنەتىنىن جەتكىزدى.
سونداي- اق، پرەزيدەنت كوروناۆيرۋس پاندەمياسىنا قاتىستى توتەنشە جاعداي بويىنشا جارلىق قابىلدادى.
اۆتور: ايجان سەرىكجان قىزى