اقمولادا ءبىرجان سال اۋدانىنىڭ 90 جىلدىعى تويلاندى
ەسكە سالا كەتسەك، ق ر پرەزيدەنتى ن. نازاربايەۆتىڭ 2017-جىلعى 13- جەلتوقسانداعى، ياعني تاۋەلسىزدىك مەرەكەسى قارساڭىنداعى جارلىعىمەن ەڭبەكشىلدەر اۋدانىنىڭ اتاۋى ءبىرجان سال اۋدانى دەپ وزگەرتىلگەن بولاتىن.
ءبىرجان سال اتىنداعى مادەنيەت سارايىنداعى سالتاناتتى ءماجىلىس «ءبىرجان سال ەلى» فيلمىنىڭ تۇساۋكەسەرىمەن باستالدى. كەڭ كولەمدى تۋىندىنىڭ شىعارماشىلىق ۇجىمى (سەناريىن جازعان مۇراتبەك وسپانوۆ) اۋداننىڭ 90 جىلدىق تاريحىنان تاراتىپ بەس تاراۋلىق تۋىندىنى ۇسىنىپ وتىر.
شارادا اقمولا وبلىسىنىڭ اكىمى مالىك ءمىرزاليننىڭ قۇتتىقتاۋىن جەتكىزگەن ءوڭىر باسشىسىنىڭ ورىنباسارى قانات ىدىرىسوۆ اۋداننىڭ الەۋمەتتىك-ەكونوميكالىق دامۋ بارىسىنداعى جەتىستىكتەرى ەل ابىرويىن كوتەرۋگە سەپتەسىپ جاتقاندىعىن اتاپ ءوتتى.
«تاريحي تۇلعالار تاربيەلەگەن ءبىرجان سال ەلى قازاق مادەنيەتىنىڭ شامشىراعى بولۋمەن قاتار، ەلباسىنىڭ ستراتەگيالىق باعىتتارىن جۇزەگە اسىرۋدا ونەگە تانىتا بەرەتىندىگىن دالەلدەۋدە. مۇندا زامانالىق اگروكەشەن قۇرىلىپ، يندۋستريالىق-يننوۆاتسيالىق ءۇردىس ماقساتكەرلىك سيپاتقا يە. مەملەكەت باسشىسى ن. نازاربايەۆتىڭ «وركەن-اتانسور» تەمىر كەنىشىن، «KazBeef LTD» وزىق ۇلگىدەگى ءىرى قارا بورداقىلاۋ كەشەنىن اشۋى ءوڭىردىڭ الەۋەتىن كورسەتەدى»، دەي كەلە، قانات مۇرات ۇلى اۋداننىڭ ءبىر توپ تۇرعىنىنا وبلىس اكىمىنىڭ العىس حاتىن تاپسىردى.
سونىمەن قاتار، اۋدان اكىمى ەرمەك نۇعىمانوۆ تا جۇرتشىلىقتى تولاعاي تويمەن قۇتتىقتاپ، ەلدىڭ وركەندەۋىنە سالماقتى ۇلەس قوسقان ازاماتتاردى ارنايى دايىندالعان مەرەكەلىك مەدالدارمەن ماراپاتتادى.
سالتاناتتى شارا مادەني جانە ۇلتتىق سپورت تۇرلەرى بويىنشا ۇيىمداستىرىلعان باعدارلاماعا ۇلاستى.