قازاقستاندا وتباسىنداعى زورلىق- زومبىلىقتىڭ 90 پايىزعا جۋىعى ايەلدەرگە جاسالادى
بۇگىن زورلىق- زومبىلىقتىڭ الدىن الۋ جونىندەگى ۆەدومستۆوارالىق كەڭەس بارىسىندا ق ر باس پروكۋرورى جاقىپ اسانوۆ وسىلاي ءمالىم ەتتى.
باس پروكۋروردىڭ ايتۋىنشا، ۇرمىستىق زورلىق- زومبىلىق - اۋىر الەۋمەتتىك سالدارى بار پروبلەما. «زورلىق- زومبىلىق ءوز الدىنا تەك جابىرلەنۋشىلەردىڭ قۇقىقتارىن بۇزىپ قانا قويماي، وسكەلەڭ ۇرپاق ءۇشىن تەرىس ۇلگى بولىپ كەلەدى. كوشەدەگى اگرەسسيانىڭ دا ءبىر سەبەبى - وتباسىنداعى جاعداي. ۇيدەن اشۋىمەن شىققان ادام ءوشىن وزگەدەن الادى. ادامداردىڭ قوعامدىق جەرلەردەگى جانە كولىكتەگى تەرىس قىلىقتارى، كوپ جاعدايدا، وتباسىندا بولىپ جاتقان جاعدايلاردىڭ كورىنىسى»، - دەدى باس پروكۋرور.
ونىڭ ايتۋىنشا، ستاتيستيكاعا سايكەس، قازاقستاندا وتباسىنداعى زورلىق- زومبىلىق سيپاتىنداعى قىلمىستاردىڭ 90 پايىزعا جۋىعى ايەل ادامدارعا قاتىستى جاسالادى. ەگدە ادامدار مەن بالالار زورلىق- زومبىلىق ارەكەتتەرگە تاپ بولاتىن جاعدايلار دا از ەمەس. «ءبىزدىڭ ماقساتىمىز تۇرعىنداردىڭ سانا- سەزىمىن وزگەرتۋدىڭ جاڭا جولدارىن ىزدەستىرۋ، وسى پروبلەماعا دەگەن كوزقاراستى وزگەرتۋ. كەيىنگى جىلدار ىشىندە ەلىمىزدە وسى سالاداعى زاڭدىلىقتى نىعايتۋ بويىنشا زاڭنامالىق جانە پراكتيكالىق شارالار قابىلداندى. ناتيجەسىندە وتباسىلىق- تۇرمىستىق سالاداعى قىلمىستاردىڭ ازايۋ ديناميكاسىنا قول جەتكىزىلدى.
الايدا بۇل پروبلەما ءالى دە وزەكتىلىگىن جوعالتقان جوق. تۇرمىستىق زورلىق-زومبىلىق سول كۇيىندە ماڭىزدى الەۋمەتتىك پروبلەما بولىپ قالىپ وتىر. كوپتەگەن قۇقىق بۇزۋشىلار جازاسىز قالۋدا، ال زورلىق- زومبىلىق فاكتىلەرى ايتىلماعان كۇيىندە تىركەلمەي قالادى.
رەسمي ستاتيستيكا جابىرلەنۋشىلەردىڭ پوليتسياعا شاعىمدانۋىنا كەدەرگى كەلتىرەتىن كوپتەگەن فاكتورلار سالدارىنان جاعدايدىڭ ناقتى سيپاتىن كورسەتپەي وتىر. سول سەبەپتى وتباسىنداعى زورلىق- زومبىلىق فاكتىلەرىنىڭ الدىن الۋدىڭ تىپتەن جاڭا جولدارىن ىزدەستىرۋ ماڭىزدى. وسىنداي ارەكەتتەردىڭ الدىن الۋدا الەۋمەتتىك- قۇقىقتىق شارالارعا باسىمدىق بەرۋ كەرەك»، - دەدى باس پروكۋرور.
اۆتور: قانات مامەتقازى ۇلى