كەڭەس وداعىنىڭ باتىرى ب. مومىش ۇلىنىڭ اديۋتانتى بولعان مايدانگەر ا، بايكەن ۇلى 90 جاسقا تولدى
بۇل تۋرالى وبلىستىق ءى ءى د باسپا ءسوز قىزمەتىنەن حابارلادى.
ەسكە سالا كەتەيىك، 1925 -جىلدىڭ 28 - جەلتوقسانىندا بۇرىنعى كوكشەتاۋ وبلىسىنىڭ ك. ماركس ۇجىمشارىندا تۋعان ايدارحان بايكەن ۇلى ۇلى وتان سوعىسىنىڭ وتتى جالىنىمەن 18 جاسقا قاراعان شاعىندا بەتپە- بەت كەلدى. سول ءبىر سۇراپىل جىلداردىڭ ەلەسىن بۇگىندە بىلاي دەپ ەسكە الادى:
«ءبىزدى 8 - گۆارديالىق ديۆيزياعا الىپ كەلدى. ديۆيزيا كومانديرى باۋىرجان مومىش ۇلى بولاتىن. كۇندەردىڭ ءبىر كۇنى مەنى قارۋلاس جولداستارىممەن بارلاۋعا جىبەردى. باعىتىمىز وتە اۋىر بولدى، ويتكەنى، جاۋدىڭ تىلىنان ءوتۋ كەرەك ەدى. نەبىر قاۋىپتى ساتتەر باستان ءوتتى. جاۋىنگەرلىك تاپسىرما جاقسى ورىندالعانىمەن، 26 جاۋىنگەردىڭ ىشىنەن 14 ادام عانا ءتىرى ورالدى. سول جولى مەن ەڭ ءبىرىنشى ماراپاتىمدى - Ⅲ دارەجەلى داڭق وردەنىن باۋىرجان مومىش ۇلىنىڭ قولىنان الدىم».
- سوعىستىڭ اتى سوعىس. اش جۇرگەن كۇندەرىمىز دە از بولعان جوق. ءبىراق، جاۋمەن ارپالىسىپ جۇرسەڭ دە، جادىڭدا ۇمىتىلماستاي جازىلىپ قالاتىن ەرەكشە ساتتەر دە جادىمدا، - دەپ قارت ارداگەر اڭگىمەسىن ودان ءارى جالعاستىردى.
- باۋىرجان مومىش ۇلىنىڭ اديۋتانتى بولىپ قىزمەت ىستەپ جۇرگەن كەزىم. سول كۇنى قاراۋىلدا تۇرۋ مەنىڭ كەزەگىم بولاتىن. جاڭبىر شەلەكتەپ قۇيىپ تۇر. بايقاماي قالعىپ كەتىپپىن. ءبىر كەزدە نەگە ۇيىقتاپ تۇرسىڭ دەپ، ديۆيزيا كومانديرى مۇرنىمدى بۇراپ جىبەرگەندە كوزىمنەن وتىم جارق ەتتى. مۇرىنسىز قالاتىن شىعارمىن دەپ ويلادىم. الايدا، بۇل مەن ءۇشىن ءومىر بويى ۇلكەن ساباق بولىپ قالدى. وسىنداي جاعدايدا باسقا ەمەس، باتىر باۋكەڭ ۇستاپ الىپ جاتسا، نە ىستەسە دە كوتەرەسىڭ عوي. وسىلاي داڭقتى قولباسشىنىڭ قول استىندا بولعانىمدى ءومىر بويى ماقتانىشپەن ەسكە الامىن.
سوعىس كەزىندە ءۇش رەت جارالاندىم، سوڭعىسى - لاتۆيا جەرىندە. سنارياد جارىقشاعى وكپەمدى تەسىپ ءوتتى. 5 اي گوسپيتالدا جاتتىم. سوعىستى 8- گۆارديالىق ديۆيزيانىڭ ينجەنەرلىك- ساپەرلىك باتالونىنىڭ كوماندير ى بولىپ اياقتاپ، مايدان جولىندا 1، 2- دارەجەلى وتان سوعىسى، 2، Ⅲ دارەجەلى داڭق وردەندەرىمەن ماراپاتتالدىم. كەيىن ىشكى ىستەر مينيسترلىگىنىڭ تاشكەنت جوعارى ميليتسيا مەكتەبىن ءبىتىرىپ، ءبىلىم الىپ، سان قيلى ەڭبەك جولىنان ءوتىپ، اۋداندىق ىشكى ىستەر ءبولىمىنىڭ باستىعى قىزمەتىنەن پولكوۆنيك شەنىمەن زەينەتكەرلىككە شىقتىم. ءبىراق، قول قۋسىرىپ قاراپ وتىرۋ ماعان جات. سوندىقتان، 20 جىل بويى بۇرىنعى كوكشەتاۋ اۋدانىندا ارداگەرلەر كەڭەسىنىڭ ءتوراعاسى بولدىم. باسىمنان نەبىر قيىنشىلىقتار ءوتتى. قۇداي قوسقان قوساعىم ەرتە دۇنيە سالىپ، التى بالامەن جالعىز قالدىم. وسى سول ۇل- قىزدارىمنىڭ قىزىعىن كورىپ، 15 نەمەرە، 13 شوبەرە ءسۇيىپ وتىرمىن، - دەدى ءسوزىنىڭ سوڭىندا ايدارحان اعا.
وبلىستىق ىشكى ىستەر دەپارتامەنتى ارداگەرلەر كەڭەسىنىڭ ءتوراعاسى داۋىتبەك امانجول ۇلى ەرجۇرەك مايدانگەردىڭ شاڭىراعىندا بولىپ، قاريانى 90 جاسىمەن قۇتتىقتاپ، ءالى دە ۇرپاقتارىنىڭ ورتاسىندا امان- ەسەن، ۇزاق ءومىر سۇرە بەرۋىنە تىلەكتەستىگىن ءبىلدىردى.
اۆتور: اسلان وسپانوۆ