يندۋستريالاندىرۋ: اقمولا وبلىسىندا يندۋستريالاندىرۋ كارتاسى شەڭبەرىندە ىسكە قوسىلعان كاسىپورىن جىلىنا 90 ميلليون جۇمىرتقا شىعارا الادى
بۇل تۋرالى «ءۇش بۇلاق-2005» سەرىكتەستىگى قۇس فابريكاسىنىڭ اتقارۋشى ديرەكتورى دياس يسپانوۆ ءمالىم ەتتى.
ونىڭ ايتۋىنشا، بۇل جوبا استانا قالاسىن ازىق- تۇلىكپەن قامتاماسىز ەتۋ بويىنشا وبلىس اۋماعىندا قولعا الىنعان ماڭىزدى ينۆەستيتسيالىق جوبالاردىڭ بىرەگەيى بولىپ وتىر.
«وتكەن جىلى پايدالانۋعا بەرىلگەن قۇس فابريكاسىنىڭ قۇرىلىسىنا 2,3 ميلليارد تەڭگە قارجى جۇمسادىق. ونىڭ بارلىعىن دەرلىك سەرىكتەستىك ءوز قالتاسىنان سالدى. كاسىپورىننىڭ جوبالىق قۋاتتى 450 مىڭ تاۋىققا ارنالعان. سونداي- اق، تاۋلىگىنە 300 مىڭ جۇمىرتقا وندىرۋگە مۇمكىندىك بەرەدى. ءوندىرىس كۇننەن- كۇنگە قارقىنىن ارتتىرىپ كەلەدى.
قازىردىڭ وزىندە كاسىپورىن تاۋلىگىنە 130 مىڭ دانا جۇمىرتقا وندىرۋدە. وسىنىڭ ارقاسىندا، ەڭبەك ونىمدىلىگى دە ارتا ءتۇستى. ىرىكتەلگەن دايىن ءونىمدى كارتون قوراپتارعا سالىپ، ارنايى مۇزداتقىشتار ورناتىلعان ساقتاۋ بولمەلەرىنە جونەلتەمىز. ودان سوڭ، استانا قالاسى مەن ەلىمىزدىڭ وزگە وڭىرلەرىندەگى جانە اۋداندارداعى ساۋدا ورىندارىنا شىعارىلادى. بۇل بىزگە جىلىنا 90 ميلليون دانا جۇمىرتقا وندىرۋگە ءارى 200 ادامدى تۇراقتى جۇمىسپەن قامتۋعا مۇمكىندىك بەرمەك»، - دەيدى قۇس فابريكاسىنىڭ اتقارۋشى ديرەكتورى دياس يسپانوۆ.
اۆتور: اسلان وسپانوۆ