تۇركيادا جەر سىلكىنىسىنەن قازا بولعان ادام سانى 9057 گە جەتتى
بۇگىن تۇركيا پرەزيدەنتى رەجەپ تايىپ ەردوعان كاحرامانماراش قالاسىندا جويقىن جەر سىلكىنىسىنەن زارداپ شەككەن ازاماتتاردىڭ شاتىرلى قالاشىعىنا باردى. پرەزيدەنت ونيكيشۋبات ستاديونىنا كەلىپ، قازا تاپقانداردىڭ تۋىستارى مەن جاقىندارىنا كوڭىل ايتىپ، جارالانعانداردىڭ تەزىرەك ساۋىعىپ كەتۋىن تىلەدى.
ر. ت. ەردوعان بارلىق قيراعان عيماراتتاردىڭ تۇرعىندارى جاڭا پاتەر الاتىنىن ايتتى.
«ءبىز بۇل قيىندىقتى جەڭىپ شىعامىز. ءبىر جاعىنان ۇيىندىلەر ارشىلىپ، ەكىنشى جاعىنان جاڭا عيماراتتاردىڭ قۇرىلىسى باستالادى. بۇل ءبىراز ۋاقىتتى الادى، ءبىراق ءبارى تەزىرەك جاسالادى»، - دەدى ول.
سوڭعى مالىمەتتەر بويىنشا، تۇركيادا جەر سىلكىنىسى كەزىندە قازا تاپقاندار سانى 9057 گە دەيىن ءوستى، 52979 ادام جارالاندى، 6444 عيمارات قيرادى.
ايتا كەتەيىك، قازاقستاندىق قۇتقارۋشىلاردىڭ ەكىنشى توبى تۇركيانىڭ گازيانتەپ قالاسىنا جەتتى. ەكىنشى توپ قۇرامىندا 60 ادام، ولاردىڭ ىشىندە ت ج م قۇتقارۋشىلارى، اپاتتار مەديتسيناسى ورتالىعىنىڭ دارىگەرلەرى، كينولوگيالىق ەسەپتەر بار.