بۇل تۋرالى قالالىق پوليتسيا دەپارتامەنتىنەن ءمالىم بولدى، دەپ حابارلايدى قازاقپارات.
«پوليتسياعا ءىرى سوماداعى اقشانىڭ ۇرلانۋى فاكتىسى بويىنشا ەلوردا تۇرعىنى حابارلاستى. ونىڭ سوزىنە قاراعاندا، Kaspi بانكىنىڭ موبيلدى قوسىمشاسىنداعى شوتىنان 900 مىڭ تەڭگە جوعالعان. اقشانىڭ ۇرلانۋىنا بايلانىستى ول ۆيرتۋالدى الاياقتارعا كۇدىك ءتۇسىپ تۇرعانىن ايتقان. تەرگەۋ امالدارى كەزىندە قاراجات جوعالاردىڭ الدىندا جابىرلەنۋشى كوشەدە دوسىن كەزدەستىرگەنى، اڭگىمە بارىسىندا تەلەفون شالۋ ءۇشىن دوسى ونىڭ سمارتفونىن سۇراعانى انىقتالدى»، - دەلىنگەن پوليتسيا دەپارتامەنتى مالىمەتىندە.
بەلگىلى بولعانداي، كۇدىكتى دوسىنىڭ تەلەفونىن الىپ، موبيلدى قوسىمشا ارقىلى 900 مىڭ تەڭگەنى ءوزىنىڭ زايىبىنىڭ تەلەفونىنا اۋدارىپ جىبەرگەن. كەيىن دوسىنا سمارتفونىن قايتارىپ بەرگەن. كۇدىكتى اتالعان سوماداعى قاراجات دوسىندا بار ەكەنىن بۇدان بۇرىن ءبىلىپ، مۇمكىندىكتى پايدالانىپ، اقشانى جىمقىرعان.
«21 جاستاعى كۇدىكتى ىستەگەن ارەكەتىن مويىندادى. فاكتى بويىنشا قىلمىستىق ءىس قوزعالدى»، - دەلىنگەن حابارلامادا.
اۆتور: رۋسلان عابباسوۆ