ءمامي: قازاقستاننىڭ بۇگىنگى قۋاتى 90- جىلدارداعى 20 قازاقستانمەن پارا-پار
«بۇگىنگى بارلىق اڭگىمە تاۋەلسىزدىگىمىزدىڭ تاماشا تابىستارى تۋرالى بولماق. جاڭا عانا ءسىز ءوز سوزىڭىزدە تاۋەلسىزدىك جىلدارى ەلىمىزدىڭ ىشكى جالپى ءونىمى 20 ەسەگە ارتقانىن ايتىپ كەتتىڭىز. بۇل بۇگىنگى قازاقستاننىڭ قۋاتى 90- جىلدارداعى 20 قازاقستانمەن پارا-پار دەگەن ءسوز. ياعني، وسى جىلدار ىشىندە ەلىمىز قۋاتى جاعىنان 20 قازاقستانعا كوبەيدى. ونداي جەتىستىكتەردىڭ ءبارى ءوزىڭىزدىڭ باتىل شەشىمدەرىڭىز جانە ساليقالى ساياساتىڭىزدىڭ ارقاسىندا جۇزەگە استى. تاريح ءۇشىن قاس قاعىم ساتتە زاڭ ۇستەمدىگى سالتانات قۇرعان قۇقىقتىق دەموكراتيالىق مەملەكەت قالىپتاستىرىپ، تۇراقتى دامۋىنا جاعداي جاسادىڭىز. ەۋرازيا كەڭىستىگىنىڭ جارىق جۇلدىزىنا اينالعان جاڭا ەلوردامىز استانا قالاسىن وتانىمىزدىڭ جۇرەگى ۇلتتىق جاڭعىرۋدىڭ بايتاعىنا اينالدىردىڭىز. ايماقتا جانە الەمدە بەيبىتشىلىك پەن تۇراقتىلىقتى ساقتاۋ ماقساتىندا قازاقستاندى حالىقارالىق سۇحبات الاڭى تاتۋلىق ورداسى رەتىندە تانىتتىڭىز. تاكاپپاردى اقىلمەن ءتاۋباسىنا كەلتىرىپ، وتكەل بەرمەس وزەنگە كوپىر سالىپ، جاقتاس پەن جوقتاستىڭ ساۋابىن الدىڭىز. تولەرانتتىلىق پەن ەلدىك ۇيىسۋدىڭ اسىل بەسىگىن تەربەتىپ، ءتۇرلى ەتنوس پەن ۇلت وكىلدەرىن ماڭگىلىك ەل يدەياسى توڭىرەگىندە توپتاستىردىڭىز»، - دەدى قايرات ءمامي قازاقستان پرەزيدەنتى نۇرسۇلتان نازاربايەۆقا قاراتا.
سونىمەن قاتار ول تاۋەلسىزدىگىمىزىدڭ تۋى كوگىمىزدە جەلبىرەگەن 25 جىل ۇلتىمىزدىڭ قانىندا مەملەكەت قۇرۋ قابىلەتىنىڭ مول ەكەندىگىن دالەلدەگەندىگىن باسا ايتتى.
«25 جىل ىشىندە قازاقستان الپاۋىت مەملەكەتتەرمەن يىق تىرەستىردى. قازاق ەلى الەمدى تانۋ مەن تانىتۋدىڭ كەڭىستىگىنە شىقتى. 25 جىل ىشىندە الەم جۇرتشىلىعىنىڭ ساناسىندا قازاقستان، نۇرسۇلتان دەيتىن قوس ءسوز بىتە قايناسقان ۇعىمعا اينالدى. 25 جىل ىشىندە يىعى ءتۇسىپ، ەڭسەسى جانشىلعان ەلدىڭ ءوڭى دە، ءتۇر-سيپاتى دا، سانا-سەزىمى دە وزگەردى. ءومىر ارەناسىنا ينتەللەكتۋالدى قوعام ورناتۋدىڭ جولىن تاڭداعان جالىنى مەن ءبىلىمى مول جاس ۇرپاق كەلدى. 25 جىلدا ولگەنىمىز ءتىرىلدى، وشكەنىمىز جاندى. ءبىرتۇتاس ەل بولىپ، الدىڭعى كوشتى اداستىرمادىق، بۇگىنگى كوشتى جاڭىلىستىرمادىق. حالقىمىز بىرلىكتى تۋ ەتتى»، - دەدى ءمامي.
اۆتور: مارلان جيەمباي