باتىس قازاقستاندا 9 اۋلا وتقا ورانىپ، 64 توننا پىشەن جانىپ كەتتى
ب ق و ت ج دەپارتامەنتىنىڭ باسپا ءسوز قىزمەتى ءمالىم ەتكەنىندەي، وقيعا 12- تامىز كۇنى اقجايىق اۋدانىندا بولدى. جاقىن ماڭداعى ءورت ءسوندىرۋ بولىمىنەن 80 شاقىرىم قاشىقتا ورنالاسقان اقسۋات اۋىلىندا بەيبىتشىلىك كوشەسىندە ساعات 15.58-دە قورا- قوپسى جانىپ، ول كورشىلەس تۇرعان قۇرىلىستارعا اۋىسقان. ءورت 550 شارشى مەتردى اۋماقتى شارپىعان. بارلىعى 9 اۋلادا قورا- قوپسى ورتەنىپ، 64 توننا پىشەن جانىپ كەتتى.
«ءتىلسىز جاۋدى» اۋىزدىقتاۋعا ت ج دەپارتامەنتىنەن 10 قىزمەتكەر، 2 تەحنيكا، ەرىكتى ءورت ءسوندىرۋ قۇرىلىمدارىنان 50 قىزمەتكەر، 2 تەحنيكا جۇمىلدىرىلدى. ءورت ساعات 22.02 دە تولىقتاي ءسوندىرىلدى. سونداي- اق 12 تامىز كۇنى ساعات 11.06 دا ورال قالاسىنا قاراستى كرۋگلووزەرنىي كەنتىنىڭ شەتىندە 120 گەكتار قۇرعاق ءشوپ پەن بۇتا جاندى.
وقيعا ورنىندا جانە ت ج دەپارتامەنتىندە ارنايى شتاب قۇرىلدى. ءورتتى سوندىرۋگە ت ج دەپارتامەنتى (104 قىزمەتكەر، 15 تەحنيكا)، ورمان شارۋاشىلىعى مەكەمەسى (20 قىزمەتكەر، 3 تەحنيكا)، ەرىكتى ءورت ءسوندىرۋ قۇرىلىمدارى (18 قىزمەتكەر، 3 تەحنيكا) اتسالىستى. ءورت ساعات 21.40 تا ءسوندىرىلدى.