فاشيستىك گەرمانيادا تۇتقىندا بولعان 9 قازاقستاندىق 2500 ەۋرودان وتەماقى الدى
بۇل تۋرالى بۇگىن الماتىداعى ق ر پرەزيدەنتى ارحيۆىندە وتكەن تاريحي- قۇجاتتىق كورمە بارىسىندا قازاقپارات تىلشىسىنە اتالعان ارحيۆتىڭ باس ساراپشىسى جىلگەلدينوۆ مۇحاممەد ايتىپ بەردى.
«2015 -جىلدىڭ اقپان ايىنان باستاپ، ق ر پرەزيدەنتىنىڭ ارحيۆى «2- دۇنيەجۇزىلىك سوعىستىڭ قازاقستاندىق اسكەري تۇتقىندارى: دەرەكتەر، ادەبيەتتەر، مالىمەتتەر» اتتى بازا جاساقتاۋ جوباسىن جۇزەگە اسىرا باستادى. وسى جوبا نەگىزىندە tutkyn.kz سايتى جاسالىپ، وعان قاماۋدا بولعان 35 مىڭنان اسا قازاقستاندىق تۋرالى مالىمەتتەر جاريالاندى. جۇمىستار ءالى دە جالعاسىپ جاتىر. وسى جوبا اياسىندا گەرمانيا فەدەراتيۆتىك رەسپۋبليكاسى جاريالاعان وتەماقىنى 9 قازاقستاندىق الدى.
ناقتىراق ايتقاندا، 2015 -جىلدىڭ قىركۇيەك ايىنان باستاپ، گ ف ر ۇكىمەتى بۇرىنعى تۇتقىندا بولعان كەڭەستىك اسكەريلەرگە 2500 ەۆرو كولەمىندە وتەماقى تولەۋ تۋرالى شەشىم شىعارعان. وسى جوبا اياسىندا ءبىزدىڭ ارحيۆ قازىر كوزى ءتىرى 12-13 ادامنىڭ قۇجاتتارىن جيناستىرىپ جىبەردى. سولاردىڭ ىشىندە بىلتىردان بەرى 2016-2017 -جىلعى ەسەپ بويىنشا، 9 ادام گەرمانيا تاراپىنان 2500 ەۋرودان وتەماقى الدى»، - دەدى م. جىلگەلدينوۆ.
ساراپشىنىڭ ايتۋىنشا، قازىرگى ۋاقىتتا تۇتقىندا بولعان قازاقستاندىقتاردىڭ وتەماقى الۋ جوباسىنا ق ر دەنساۋلىق ساقتاۋ جانە الەۋمەتتىك دامۋ مينيسترلىگى دە قوسىلىپ جاتىر. «ۆەدومستۆو ءار وبلىستان اسكەريلەر بويىنشا اقپاراتتار جيناستىرۋدا. ءبىراق، گەرمانياعا قۇجاتتاردى جولداپ وتىرعان پرەزيدەنت ارحيۆى بولعاندىقتان مالىمەتتەر وسىندا جىبەرىلەدى دە، ءبىز ءوز تاراپىمىزدان تەكسەرىپ، گەرمانياعا جولدايمىز. گەرمانيادا دا تەكسەرىلەدى. ولاردا كونسەنتراتسيالىق لاگەرلەردە بولعانداردىڭ تىزىمدەرى ساقتالعان. سول جەردە سايكەستەندىرىلەدى. ەگەر بارلىعى انىقتالسا، وندا 1 - 1,5 ايدىڭ كولەمىندە وتەمەقاسىن الادى»، - دەدى ق ر پرەزيدەنتى ارحيۆىنىڭ باس ساراپشىسى.
گەرمانيا تاراپىنان جاسالىپ جاتقان بۇل جوبا 2017 -جىلدىڭ قىركۇيەك ايىندا اياقتالاتىنىن ەسكەرتكەن مامان ءالى دە ۋاقىت بار ەكەنىن ايتتى. «ءبىز ءالى دە حابارلاپ، وسىنداي جوبا جۇزەگە اسىرىلىپ جاتقانىن ايتىپ جاتىرمىز. كوزى ءتىرى قازاقستاندىق اسكەري تۇتقىن بولسا، كەرەك قۇجاتتارىن جىبەرىپ، بىزگە حابارلاسسا، گەرمانياعا تەزىرەك جىبەرىپ، وتەماقى الۋىنا مۇمكىندىك جاسالادى»، - دەدى ول.
اۆتور: الماس مۇقاش ۇلى