تالدىقورعاندا ءبىر ايدان بەرى 8 ايلىق ءسابيىن ىزدەپ جۇرگەن ايەل بالاسىمەن قاۋىشتى

تالدىقورعان. قازاقپارات - جەتىسۋ وبلىسىندا ەمشەكتەگى بالاسىن جوعالتىپ العان كەلىنشەك ءسابيىن تاپتى. ول وسىنىڭ الدىندا 8 ايلىق نارەستەسىن كۇيەۋى اكەتىپ قالعانىن مالىمدەگەن، دەپ حابارلايدى قازاقپارات.

بۇل جايىندا نەمولچي قورىنىڭ جازباسىنان بەلگىلى بولعان ەدى.

قور باسشىسىنىڭ ايتۋىنشا، وسىدان ءبىراز ۋاقىت بۇرىن سەگىز ايلىق بالانىڭ اكەسى ەنەسىن سوققىعا جىققانى ءۇشىن 15 تاۋلىككە قامالعان.

سول جانجالدان سوڭ ايەل بالاسىن تاپپاي قالعان. ونى اكەسىنىڭ تۋىستارى جاسىرىپ ۇستاپ وتىرۋى مۇمكىن.

وسىدان كەيىن جەتىسۋ وبلىسىنىڭ پوليتسەيلەرى شۇعىل نارەستەنى ىزدەۋگە كىرىستى.

«بالا تالدىقورعان قالاسىندا جەكە سەكتوردا تۇراتىن اكەسىنىڭ تۋىستارىنان تابىلدى. قازىرگى ۋاقىتتا نارەستە اناسىنىڭ جانىندا، ءوز كەزەگىندە ول قالالىق پوليتسيا قىزمەتكەرلەرىنە ءبۇلدىرشىنىن ىزدەۋگە كومەكتەسكەنى ءۇشىن العىس ايتتى» دەلىنگەن پوليتسيا حابارلاماسىندا.

نارەستەنىڭ بولاشاق تاعدىرىن قورعانشىلىق جانە سوت ورگاندارى وكىلدەرى شەشەدى.

بالانىڭ اكەسى سوت شەشىمىمەن اكىمشىلىك قاماۋدا وتىر.