ماسكەۋدە 8 ادام قازا تاپقان ەكسكۋرسيانى ۇيىمداستىرۋشىلار ىشىندە قازاقستان ازاماتى بار
بۇل تۋرالى ماسكەۋ پروكۋراتۋراسىنىڭ باسپا ءسوز قىزمەتىنەن ءمالىم بولدى، دەپ حابارلايدى قازاقپاراتتىڭ مەنشىكتى ءتىلشىسى.
ماسكەۋ پروكۋراتۋراسىنىڭ مالىمەتىنشە، «سپۋتنيك» جاۋاپكەرشىلىگى شەكتەۋلى سەرىكتەستىگىنىڭ 35 جاستاعى باس ديرەكتورى الەكساندر كيم مەن 31 جاستاعى نيكيتا دۋباس ۇستالعان.
«ولارعا ر ف قىلمىستىق كودەكسىنىڭ 238-بابى 3-بولىگى بويىنشا ايىپ تاعىلدى. ولار كىناسىن مويىندامادى»، - دەدى پروكۋراتۋرا.
رەسەيدىڭ تەرگەۋ كوميتەتىنىڭ مالىمەتىنشە، 20- تامىزدا ەكسكۋرسوۆود 7 ادامنان تۇراتىن توپپەن بىرگە ماسكەۋدەگى نەگلينكا وزەنىنىڭ جەراستى كوللەكتورىنا زاڭسىز ەكسكۋرسيا ۇيىمداستىرىپ، سالدارىنان ادامدار قازا تاپقان.
سونىڭ ىشىندە كامەلەتكە تولماعان ەكى بالا جانە گيد بار. تەرگەۋشىلەر وسى ەكسكۋرسيانى ۇيىمداستىرۋعا قاتىسى بار ءۇش ادامدى انىقتادى.
قىلمىستىق ءىس بويىنشا ايىپتالۋشىلار قاتارىندا ۇستالعانداردان بولەك، 21- تامىزدا بىرىككەن اراب امىرلىكتەرىنە ۇشىپ كەتكەن «اۆانگارد» ەكسكۋرسيالىق بيۋروسىنىڭ باس ديرەكتورى الەكساندر لازوۆسكي دە بار.
رەسەيلىك ب ا ق حابارلاعانداي، الەكساندر كيم - قازاقستان ازاماتى، 2006-جىلى رەسەيگە كەتكەنگە دەيىن قونايەۆ قالاسىندا تۇرعان.
سانكت-پەتەربۋرگتە ول بۇكىل الەم بويىنشا ەكسكۋرسيا برونداۋ ءۇشىن ستارتاپ جاساعان. قازىر ول تەرگەۋگە بايلانىستى ماسكەۋدە.
قازاقستاننىڭ رەسەيدەگى ەلشىلىگى جاعدايدىڭ باقىلاۋدا، كونسۋلدىق قىزمەتكەرلەرى ادۆوكاتتارمەن بايلانىستا ەكەنىن حابارلادى.
قاجەت بولعان جاعدايدا ازاماتىمىزدىڭ زاڭدى قۇقىقتارى مەن مۇددەسىن قورعاۋ ماقساتىندا كونسۋلدىق قولداۋ كورسەتەدى.
بۇرىن حابارلانعانداي، قاتىسۋشىلارى ءىز-ءتۇزسىز جوعالعان زاڭسىز ەكسكۋرسيا ماسكەۋدە 20- تامىزدا بولعان.
قاتتى جاڭبىر باستالعاندا سۋ كۇرت كوتەرىلىپ، تۋريستەردىڭ جەر بەتىنە قاشىپ شىعۋعا مۇمكىندىگى بولمادى.
سەگىز ادام قازا تاپتى، ولاردىڭ دەنەسى نەگلينكا وزەنىنەن تابىلدى. مۇنداي نىساندارعا تەك ارنايى قىزمەت قىزمەتكەرلەرى عانا كىرە الادى.