بۇل تۋرالى «اشىق» ن ق ا پورتالىندا جاريالانعان ۇكىمەت قاۋلىسىندا كورسەتىلگەن، دەپ حابارلايدى قازاقپارات ءتىلشىسى.
«ۇزدىكسىز پاندەميا جاعدايىندا بۇكىل الەمدە ەكونوميكالىق ءوسۋ قارقىنىنىڭ باياۋلاۋى بايقالادى. شەكارالاردىڭ جابىلۋىنا بايلانىستى ەلدەر اراسىنداعى سىرتقى ساۋدا قاتىناستارى تومەندەدى جانە پاندەمياعا دەيىنگى ساۋدا قاتىناستارى قاشان قالپىنا كەلەتىنى بەلگىسىز. وسىعان بايلانىستى، اگروونەركاسىپتىك كەشەن ءونىمىنىڭ ەكسپورتىن 1,5 ەسەگە ۇلعايتۋعا (3 ەسە جوسپارلانعان - رەد. ) وزگەرتۋ، قايتا وڭدەلگەن ءونىمنىڭ ۇلەسىن 50 پايىزعا دەيىن جەتكىزۋ ۇسىنىلادى. سونداي-اق، 2021-جىلعى قۇرعاقشىلىق اۋىل شارۋاشىلىعى ءونىمىنىڭ شىعىمىن 2,4 پايىزعا تومەندەتتى، بۇل ەكسپورتتىق پوزيتسيالاردىڭ وسۋىنە دە كەرى اسەرىن تيگىزدى»، - دەلىنگەن قۇجاتتا.
بۇعان دەيىنگى جوسپارعا سايكەس اگروونەركاسىپتىك كەشەن ونىمدەرىنىڭ ەكسپورتىن 2020-جىلمەن سالىستىرعاندا 2030-جىلعا دەيىن 3 ەسە ۇلعايتۋ كوزدەلگەن ەدى. 2030-جىلى ەكسپورت مولشەرى 9,9 ميلليارد دوللارعا جەتۋى ءتيىس بولاتىن. ال ەندى جاڭا وزگەرىسكە ساي، ونىڭ كولەمى الداعى 8 جىلدا 6,6 ميلليارد دوللار بولادى.
«اۋىل شارۋاشىلىعى سالاسىنداعى ينۆەستيتسيالىق جوبالاردى قارجىلاندىرۋ جانە ەكسپورتقا باعدارلانعان قايتا وڭدەلگەن ءونىمنىڭ قوسىمشا ءوندىرىسىن قۇراتىن تەحنيكانى ساتىپ الۋ ءۇشىن 2022-جىلدان باستاپ «بايتەرەك» ۇ ب ح» ا ق- نىڭ جارعىلىق كاپيتالىن 780 ميلليارد تەڭگەگە ۇلعايتۋ كوزدەلگەن. بۇل رەتتە بيۋجەتتەن تەك 79 ميلليارد تەڭگە، ياعني 2023-جىلدان باستاپ تەحنيكا ساتىپ الۋعا جانە 2024-جىلدان باستاپ ينۆەستيتسيالىق جوبالاردى كرەديتتەۋگە قولداۋ كورسەتىلدى. بۇل رەتتە بيزنەس پەن بانك سەكتورى ەكسپورتقا باعدارلانعان ينۆەستيتسيالىق جوبالاردى قۇرۋعا وسىنداي قاراجات كولەمىن قارجىلاندىرۋعا دايىن ەمەس»، - دەپ كورسەتىلگەن قاۋلىدا.
قۇجاتتى اشىق تالقىلاۋ كەلەر جىلدىڭ 6- قاڭتارىنا دەيىن جالعاسادى.