«مينيستر دىنمۇحاممەدكە باتىل ءىس-ارەكەتى ءۇشىن، ال ونىڭ اتا-اناسىنا كومەككە كەلۋگە دايىن تۇراتىن بالانى تاربيەلەگەنى ءۇشىن العىس ءبىلدىردى»، - دەلىنگەن مينيسترلىك مالىمەتىندە.
ۆەدومستۆولىق ناگرادانى كىشكەنتاي باتىرعا اتىراۋ وبلىسى توتەنشە جاعدايلار دەپارتامەنتى باستىعىنىڭ مىندەتىن اتقارۋشى نۇرلان جاڭاباي تابىس ەتتى.
ەسكە سالايىق، وقيعا 3-جەلتوقسان كۇنى اتىراۋ قالاسىنداعى جايىق وزەنىنىڭ جاعاسىندا بولدى. دىنمۇحاممەد جەكسەنبى كۇنى تۇستەن كەيىن 14 جانە 9 جاستاعى دوستارىمەن مۇز ۇستىندە ويناپ جۇرگەن. كەنەت ءالسىز مۇز جارىلىپ، ەكى دوسى سۋ استىنا كەتەدى. شەتتە تۇرعان دىنمۇحاممەد ءوز ءومىرىن قاتەرگە تىگە وتىرىپ، ويلانباستان كومەككە ۇمتىلدى. سولاي دوستارىنىڭ ءبىرىن سۋدان الىپ شىقتى.
كەيىن جەرگىلىكتى پوليتسيا قىزمەتى باسقارماسىنىڭ باستىعى ەرلان بيعامبايەۆ مەكتەپكە بارىپ، كىشكەنتاي قۇتقارۋشىعا وبلىستىق پوليتسيا دەپارتامەنتى باستىعىنىڭ العىس حاتىن تاپسىردى.
ايتا كەتەيىك، 4-جەلتوقساندا اتىراۋ وبلىسىندا تاعى ءبىر وقيعا بولدى. وندا ەر ادام نەمەرەسىمەن سەرۋەندەپ ءجۇرىپ، جايىق وزەنىندەگى مۇز استىنا ءتۇسىپ كەتتى. وقيعا كۋاگەرلەرى 10 جاستاعى بالانى قۇتقارىپ ۇلگەردى.