«سىزدەردىڭ نازارلارىڭىزعا «1994 -جىلعى 9 - قىركۇيەكتەگى ەۋرازيالىق پاتەنت كونۆەنتسياسىنا ونەركاسىپتىك ۇلگىلەردى قورعاۋ تۋرالى حاتتاماسىن راتيفيكاتسيالاۋ تۋرالى» زاڭ جوباسىن قاراستىرۋعا ۇسىنىپ وتىرمىز. حاتتامادا ونەركاسىپتىك ۇلگىلەرگە ەۋرازيالىق پاتەنتتەردىڭ قۇقىقتىق قورعاۋ ەرەكشەلىكتەرى، ارەكەت ەتۋ قاعيداتتارى، ءوتىنىش بەرۋشىلەردىڭ، قۇقىق يەلەنۋشىلەردىڭ قۇقىقتارى مەن مىندەتتەرى، سونداي- اق ەۋرازيالىق پاتەنت ۆەدومستۆوسى جۇزەگە اسىراتىن مىندەتتەمەلەر مەن ۋاكىلەتتىكتەر كوزدەلگەن. اتالعان زاڭ جوباسى وڭىرلىك پاتەنت جۇيەسىن جەتىلدىرۋ ماقساتىندا ەنگىزىلىپ وتىر»، - دەدى مينيستر.
ونىڭ اتاپ وتۋىنشە، حالىقارالىق پاتەنتتەۋ كەزىندە ءار مەملەكەتتە جەكە ءوتىنىم بەرۋ جانە جەكە تولەمدەردى تولەۋ ايتارلىقتاي اكىمشىلىك كەدەرگى بولىپ تابىلادى.» قازاقستاندىق ءوتىنىم بەرۋشىلەر ءۇشىن وڭىرلىك جۇيەنىڭ ارتىقشىلىعى - وبەكتىنى سەگىز مەملەكەتتە ءبىر ۋاقىتتا قورعاۋ ءۇشىن ەۋرازيالىق پاتەنت ۆەدومستۆوسىنا جۇگىنۋ مۇمكىندىگى. بۇل جۇيە ەۋرازيالىق اۋماقتا ساۋدا جاساۋ بارىسىندا ونەركاسىپتىك ۇلگىلەردى قورعاۋدىڭ دەڭگەيىن ارتتىرۋعا جانە وسى جۇيەنىڭ مۇشە مەملەكەتتەرىنىڭ ينۆەستيتسيالىق تارتىمدىلىعىن ارتتىرۋعا مۇمكىندىك بەرەدى. وڭىرلىك پاتەنت ەۋرازيالىق نارىققا باعىتتالعان وتاندىق تاۋار وڭدىرۋشىلەرىنىڭ مۇمكىندىكتەرىن ارتتىرادى»، - دەدى مارات بەكەتايەۆ.
حاتتامانى راتيفيكاتسيالاۋ ناتيجەسىندە وتاندىق تاۋار وندىرۋشىلەردىڭ ونەركاسىپتىك ۇلگىسىنە العان پاتەنتى ەۋرازيالىق پاتەنتتەۋ جۇيەسىنە قاتىسۋشى 8 مەملەكەتتە ناقتى ايتقاندا ارمەنيا، ازەربايجان، بەلارۋس، قىرعىز رەسپۋبليكاسى، قازاقستان رەسپۋبليكاسى، رەسەي فەدەراتسياسى، تۇرىكمەنستان جانە تاجىكستان رەسپۋبليكاسىندا قولدانىلا الادى.
اۆتور: مارلان جيەمباي