قازاقستاندا 8 كۇن ەلەكتر ستانسياسى سالىنادى

استانا. قازاقپارات - ق ر ەنەرگەتيكا ۆيتسە-ءمينيسترى اناتولي شكارۋپا بالامالى ەنەرگيا كوزدەرى جوبالارى بويىنشا كۇزگى اۋكسيون ناتيجەلەرىن ايتىپ بەردى، دەپ حابارلايدى قازاقپارات ءتىلشىسى.

«3-18 -قازان كۇندەرى ب ە ك جوبالارىنىڭ كۇزگى اۋكسيونى ءوتتى. اۋكسيون قورىتىندىسى بويىنشا الماتى، تۇركىستان، قىزىلوردا جانە جامبىل وبلىستارىندا جانە شىمكەنت قالاسىنىڭ ماڭىندا جالپى قۋاتى 202 م ۆ ت بولاتىن سەگىز كۇن ەلەكتر ستانسياسى ىسكە قوسىلادى. بۇل ماقساتتا 73 ميلليارد تەڭگە ينۆەستيسيالاندى. الداعى ءۇش جىلدا 22 ميلليارد تەڭگەگە الماتى جانە جامبىل وبلىستارىندا ءۇش سۋ ەلەكتر ستانسياسى تۇرعىزىلادى»، - دەدى اناتولي شكارۋپا ۇكىمەت ۇيىندە وتكەن باسپا ءسوز ءماسليحاتىندا.

ونىڭ ايتۋىنشا، اۋكسيوندىق ساۋدا- ساتتىق جەرگىلىكتى جانە حالىقارالىق قاتىسۋشىلاردىڭ ۇلكەن قىزىعۋشىلىعىن تۋدىرعان. وعان الەمنىڭ 9 ەلىنەن - قازاقستان، قىتاي، رەسەي، تۇركيا، فرانسيا، بولگاريا، يتاليا، ب ا ءا، نيدەرلاند كورولدىگىنەن 113 كومپانيا قاتىسقان.

اۋكسيوندىق ساۋدا- ساتتىق ناتيجەسىندە بالامالى ەنەرگەيا كوزدەرى بويىنشا جالپى قۋاتى 858 م ۆ ت بولاتىن 36 جوبا ىرىكتەلىپ الىندى. ونداعى 500 م ۆ ت - جەل ەلەكتر ستانسيالارىنا، 270 م ۆ ت - كۇن ەلەكتر ستانسيالارىنا، 82 م ۆ ت - سۋ ەلەكتر ستانسيالارىنا جانە 5 م ۆ ت - بيوەلەكتر ستانسيالارىنا تيەسىلى.