دارىگەرلەر ەلوردادا مەنينگيتپەن تۇسكەن 8 بالانىڭ جاعدايى تۋرالى ايتتى
«قازىرگى تاڭدا بالالار ينفەكسيالىق اۋرۋحاناسىندا ستاتسيونارلىق ەمدەۋدە مەكتەپ جاسىنداعى 8 بالا جاتىر. ولار 5 -قازاننان بەرى تۇسكەن. بۇگىنگى كۇنى دەنساۋلىقتارى جاقسارىپ كەلەدى. بالالار ءوزىن جاقسى سەزىنەدى. 10 كۇننەن كەيىن قايتادان اناليز الىنىپ، ءبىزدىڭ بولجاۋىمىزشا كوپ وتپەي ساۋىعىپ، اۋرۋحانادان شىعارىلىپ، امبۋلاتوريالىق باقىلاۋدا بولادى»، - دەيدى باس دارىگەر بالالار ينفەكسيالىق اۋرۋحاناسىندا تىلشىلەردىڭ سۇراعىنا جاۋاپ بەرە وتىرىپ.
ساۋلە نۇرىشەۆانىڭ ايتۋىنشا، بالالارى اۋرۋحاناعا تۇسسە دە، اتا-انالار سابىرمەن قابىلداپ، ەشقانداي شۋ شىعارماعان.
«بۇل - ۆيرۋستى ينفەكسيا. كەزەڭى قالىپتى دەڭگەيدە ءوتىپ كەلەدى. كۇردەلىلىك بايقالمايدى. ءبىزدىڭ ستاتسيوناردا وسى جىلدىڭ ىشىندە 190 داي بالا ەمدەلىپ شىقتى. ءبارىنىڭ دە اۋرۋى اسقىنىپ كەتكەن جوق، ساۋىعىپ ۇيلەرىنە قايتتى. ەمدەۋ جۇمىستارى ءتيىستى حاتتامالارعا سايكەس جۇرگىزىلۋدە. سوندىقتان، ۋايىمداۋدىڭ ەش رەتى جوق»، - دەيدى ول.
ارۋحانانىڭ باس دارىگەرى مەنينگيتكە شالدىققان بالالاردىڭ اتا-اناسىنا وزدىگىمەن ەمدەۋ تۋرالى شەشىم قابىلداماۋعا كەڭەس بەردى.
«مەنينگيتتىڭ العاشقى بەلگىلەرى - تەمپەراتۋرانىڭ 37,5-39 گرادۋسقا دەيىن كوتەرىلۋى، باس اۋرۋى، قۇسۋى جانە جۇرەكتىڭ اينۋى. مۇنداي جاعدايدا بالانى پەدياتورعا نەمەسە ءبىزدىڭ ستاتسيونارعا اپارۋ كەرەك. ءبىز ول بالانى دياگنوستيكا جۇرگىزىپ، اۋرۋحاناعا جاتقىزامىز»، - دەيدى ول.
ساۋلە نۇراشەۆا اتاپ وتكەندەي، قازىر مەنينگيتپەن اۋرۋحاناعا تۇسكەن 1-7 -سىنىپ ارالىعىنداعى بالالاردىڭ ءبارى دە قالانىڭ ءارتۇرلى مەكتەپتەرىنىڭ وقۋشىلارى. ياعني، بالالاردىڭ ءبىر- بىرىنە مەنينگيتتىڭ جۇعىپ، اۋرۋحاناعا ءتۇسۋ جاعدايى تىركەلمەگەن.
«بۇل ۆيرۋستى ينفەكسيا اۋا تامشىلارى ارقىلى ادامنان ادامعا جۇعادى. مەنينگيتكە قاتىستى دۇربەلەڭنىڭ نەلىكتەن تۋعانىن تۇسىندىرە المايمىن. بۇل ءبىز ءۇشىن جىل سايىنعى قالىپتى قۇبىلىس. مىسالى، مەنينگيتپەن اۋرۋحاناعا بيىل تۇسكەندەر بىلتىر تۇسكەندەرگە قاراعاندا كوبەيگەن جوق. سوندىقتان، دۇرلىگۋدىڭ قاجەتى شامالى»، - دەيدى ساۋلە نۇراشەۆا.