سەمەيدە عاسىر جاساعان 8 اجە تۇرادى
«نۇر وتان» پارتياسىنىڭ قالالىق فيليالىنىڭ مۇشەلەرى مەن ىسكەر ايەلدەر قاۋىمداستىعىنىڭ وكىلدەرى العاش بولىپ 102 جاستاعى زەينەزايپ شۇكشىمبايەۆانىڭ ۇيىنە باردى. قۇرمەت كورسەتىپ، سىي-سياپاتتارىن تابىستادى. ەكى عاسىردىڭ كۋاسى بولعان، زۇلمات جىلدارى ايانباي تەر توككەن تىل ارداگەرى زەينەزايپ اجەي شاڭىراعىنا ارنايى قۇتتىقتاي كەلگەندەرگە العىسىن ءبىلدىرىپ، اق باتاسىن بەردى.
102 جاستاعى اجە 1947-1982 -جىلدارى بەسقاراعاي اۋدانىندا ورمان شارۋاشىلىعىندا قارا جۇمىسشى بولىپ ەڭبەك ەتكەن. سانالى عۇمىرىنىڭ بىرنەشە جىلى سۇراپىل سوعىس جىلدارىمەن تۇسپا- تۇس كەلگەن كەيۋانا بۇگىندە 2 بالاسىنان 6 نەمەرە، 13 شوبەرە، 6 شوپشەك ءسۇيىپ وتىر.
«سوعىستى دا، جوقشىلىق پەن اشتىقتى دا كوردىك قوي. قازىر زامان بەيبىت، تىنىش. قۇدايعا ءتاۋبا. بىزدەر تالاي زوبالاڭ جىلداردى كوردىك. بۇگىنگى بالالار باقىتتى. بىزدە بالالىق شاق بولعان جوق. ءومىر بويى قارا جۇمىستا ەڭبەك ەتتىك. ءبىراق شۇكىر»، - دەيدى تىل ارداگەرى.
مەرەكە قارساڭىندا ارنايى توپ جاسى 100 دەن اسقان 8 اجەنىڭ ۇيىنە بارىپ قۇتتىقتادى. شارا پارتيانىڭ «ارداگەرلەردى ارداقتايىق»، «باقىتتى وتباسى - باقىتتى بالالىق شاق» جوبالارى اياسىندا قولعا الىندى.