بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە «قازاقستان» ۇلتتىق تەلەارناسىنىڭ باسقارما ءتورايىمى نۇرجان مۇحامەدجانوۆا ايتتى.
«تۇڭعىش رەت ەلىمىزدە جاس ءانشى ءوزىنىڭ شىعارماشىلىق ەڭبەگىنىڭ 10 جىلدىق مەرەيتويىنا وراي 3D گرافيكامەن ۇلكەن كونسەرت وتكىزەيىن دەپ وتىر. بۇل كونسەرتتەن تۇسكەن قارجى قايىرىمدىلىق قورىنا اۋدارىلادى»، - دەدى ول.
ونىڭ اتاپ وتۋىنشە، «قازاقستان» تەلەارناسى ءاردايىم ەلىمىزدەگى جاس ونەرپازداردى، قازاق ونەرىن پاش ەتىپ جۇرگەن ازاماتتارىمىزدى ۇنەمى قولداپ وتىرادى.
«سوندىقتان ءبىز ءوزىمىزدىڭ وسى داستۇرىمىزدەن تانباي جاس ونەرپازدىڭ ونەرىن قولداعىمىز كەلدى. وزدەرىڭىز دە بىلەسىزدەر، قايرات نۇرتاس ءبىزدىڭ ەلىمىزدەگى ايرىقشا قۇبىلىس دەسەك بولادى»، - دەدى ن. مۇحامەدجانوۆا.
ايتا كەتەرلىگى، استانا مەن الماتى قالالارىندا وتەتىن كونسەرتتەن تۇسكەن قاراجاتتىڭ 8 ميلليون تەڭگەسى قايىرىمدىلىق شارالارىمەن بەلسەندى اينالىسىپ جۇرگەن قورلارعا اۋدارىلادى. ناقتى ايتقاندا، استانا قالاسىنان تۇسكەن قارجىنىڭ 2 ميلليون تەڭگەسى «سان ادام» قورىنا 1,5 ميلليون تەڭگەسى «ءۇنسىز الەم» قورىنا، 1,5 ميلليون تەڭگەسى «قازاق سوقىرلار قوعامى» قوعامدىق بىرلەستىگىنە، ال الماتىدان تۇسكەن قارجىنىڭ 1,5 ميلليون تەڭگەسى «اينالايىن» بالالار- جاسوسپىرىمدەر ورتالىعى» جاستار كلۋبى قوعامدىق بىرلەستىگىنە، 1,5 ميلليون تەڭگەسى تالدىقورعان قالاسىنىڭ «قارلىعاش» مۇگەدەك ايەلدەر قوعامدىق بىرلەستىگىنە اۋدارىلادى.
اۆتور: مارلان جيەمباي