بۇل تۋرالى قاراعاندى قالاسى اكىمىنىڭ ورىنباسارى ارمان جۇمەكەنوۆ حابارلادى.
«شايىلعان جول ۋچاسكەسىن قالپىنا كەلتىرۋ شارالارى قابىلداندى. جول تۇتاستاي قايتا جوندەلدى دەۋگە بولادى. 150 توننا اسفالت، 120 توننا ءىرى قيىرشىق تاس، ۇساق تاس، سونشا جامىلعى توسەلدى»، - دەدى جۋرناليستەرگە بەرگەن سۇحباتىنا ا. جۇمەكەنوۆ.
ونىڭ ايتۋىنشا، جۇمىس 8 كۇندە جەدەل جۇرگىزىلدى.
«8 ميلليون تەڭگە اقشا كەتتى، جوندەۋ جۇمىستارىنا بيۋدجەتتەن تىس قاراجات جۇمسالدى. ءبىز جول ۇيىمدارىن تارتتىق، - دەپ اتاپ ءوتتى اكىم ورىنباسارى. - وزدەرىڭىز بىلەسىزدەر، قاراعاندى قالاسىنىڭ اۋماعىندا ت ج جاريالانعان جوق، سوندىقتان توتەنشە قوردىڭ قاراجاتىن پايدالانا المايمىز، بۇل تازا بيزنەستىڭ الەۋمەتتىك جاۋاپكەرشىلىگى».
ول سۋ تولىقتاي توقتاعاندا، «قازاق اۆتو جول» كونۋس پليتالاردى قالپىنا كەلتىرىپ، جول جيەگىن نىعايتىپ، جول بەلگىلەرى قويىلاتىنىن اتاپ ءوتتى.
«قازىر قيراعان جول اشىلدى. قاۋىپسىزدىك قامتاماسىز ەتىلدى. ءبىزدىڭ قالالىق اۋەجايعا اينالما جولمەن ەمەس، تىكەلەي بارۋعا بولادى»، - دەپ ءسوزىن تۇيىندەدى ول.
بۇدان بۇرىن حابارلانعانداي، 10-11 - ساۋىردە سوقىر وزەنىنىڭ ارناسىنان تاسىعان سۋ قاراعاندىلىق «سارى ارقا» اۋەجايىنىڭ جولىن باستى. جول قوزعالىسى شەكتەلىپ، اۋەجايعا اينالما جولمەن شىعۋعا تۋرا كەلدى.
قاراعاندى وبلىسى اكىمدىگىنىڭ اقپاراتىنا سۇيەنسەك، وڭىردە سۋ تاسقىنى كەزەڭىندە جەرگىلىكتى ماڭىزى بار 17 شاقىرىم جولدى سۋ شايدى. بۇدان باسقا، 84 سۋ وتكىزۋ قۇبىرلارى مەن 12 كوپىر قيرادى.
جول ۇزىندىعى 9343 شاقىرىمدى قۇرادى.