قازاقستاندا جاسالعان: شىمكەنتتەگى كاسىپورىن جىلىنا 8 ميلليون شاقىرىم سىم تەمىر شىعارادى
11:24, 22 - اقپان 2015
شىمكەنت. قازاقپارات - «K.AZ TEL» كاسىپورنى جىلىنا 8 ميلليون شاقىرىم كابىل ءونىمىن شىعارادى. مۇندا كابىلدىڭ 100 دەن استام ءتۇرى، جەز بەن اليۋمەني سىمدارى بار،
دەپ حابارلادى وبلىس اكىمىنىڭ باسپا ءسوز قىزمەتىنەن.
تەحنولوگتار سىمنىڭ زاۋىتقا بولات سىم تۇرىندە كەلەتىنىن ايتتى. سوسىن ونى سەحتا قىسىممەن 7 ەسەگە جىڭىشكەرتەدى. وسىدان كەيىن سىمدى شيىرشىقتاۋ ءۇشىن سەحقا جىبەرەدى. سوسىن، تاپسىرىس بەرۋشىنىڭ قالاۋى بويىنشا وڭدەلىپ، ورالىپ، كابىلدىڭ سىرتى قاپتالاتىن بولادى.
«كابىل- سىم ونىمىنە نارىقتا سۇرانىس بار. قازىر نەگىزىنەن رەسەيدەن يمپورت اكەلىنۋدە. ىشكى نارىقتى كوبىرەك قامتۋ ءۇشىن ءبىز ءوندىرىستى كەڭەيتپەكپىز»، - دەدى كاسىپورىننىڭ باس بۋحگالتەرى بەركەنباي قۇرالوۆ.
ب. قۇرالوۆتىڭ ايتۋىنشا، كاسىپورىن وسى ماقسات ءۇشىن «دامۋ» كاسىپكەرلىكتى دامىتۋ قورىنىڭ قولداۋىمەن 158 ميلليون تەڭگە نەسيە الدى. بۇل جەلىنى ىسكە قوسقاننان كەيىن زاۋىت قۋاتى ەكى ەسە ارتادى.