اقتوبە كولونياسىندا بۇلىك شىعارعاندار 8 جىلعا باس بوستاندىقتارىنان ايىرىلدى
04:46, 09 - جەلتوقسان 2014
اقتوبە. قازاقپارات - اقتوبە قالاسىنىڭ № 2 سوتىندا وسى جىلدىڭ شىلدە ايىندا 168/2 كولونياسىندا بۇلىك شىعارعان بەس سوتتالۋشىعا قاتىستى ۇكىم شىعارىلدى، دەپ حابارلايدى وبلىستىق سوتتىڭ باسپا ءسوز قىزمەتىنەن
جازاسىن وتەۋشىلەر ق ر ق ك- نىڭ 360 - بابى - قىلمىستىق-تۇزەۋ مەكەمەسى اكىمشىلىگىنىڭ تالاپتارىنا قاساقانا باعىنباۋ بويىنشا ايىپتى دەپ تانىلىپ، ءارقايسىسى 8 جىلعا باس بوستاندىعىنان ايىرۋ جازاسىنا كەسىلدى.
ءىس ماتەريالدارىندا جازىلعانداي، 2014 - جىلدىڭ شىلدە ايىندا سوتتالۋشى اسەت تەمىرزاحوۆ ن. قوسماعامبەتوۆ، س. داۋلەشوۆ، ج. الىبايەۆ، ب. حىدىروۆ جانە تاعى باسقا سوتتالۋشىلارمەن بىرىگىپ كولونيادا بۇلىك شىعاردى.
بولىمشەلەرلىڭ بىرىندە بەكىنىپ العان ولار ەسىمدەرى بەلگىسىز سوتتالۋشىلار توبىمەن ىشتەرىن كەسىپ، باسقا سوتتالۋشىلاردى وسىعان ماجبۇرلەدى، سونداي-اق كولونيا باسشىلىعىنا رەجىمدى جۇمسارتۋ قاجەتتىلىگى تۋرالى تالاپتار قويدى.
بۇلىك كەزىندە سوتتالۋشىلار كولونيانىڭ مۇلكىنە شامامەن 700 مىڭ تەڭگەگە زيان كەلتىردى.
سوت ۇكىمى زاڭدى كۇشىنە ەنگەن جوق.