بيبىگۇل تولەگەنوۆا 89 جاسىندا شاكىرتتەرىمەن بىرگە كونسەرت وتكىزدى
بۇعان دەيىن 89 جاستاعى ءانشى 2014 -جىلى كونسەرت بەرگەن ەدى.
«استانادا ءۇيىم بار، ۇنەمى كەلىپ تۇرامىن. استانانىڭ جاڭالىقتارىن قاراپ وتىرامىز. سوندىقتان، استاناعا قوناققا كەلمەيمىن، ءوز ۇيىمە كەلدىم دەپ ايتامىن. ءوزىم وسى قالانىڭ قۇرمەتتى ازاماتى بولعاندىقتان، 20 جىلدىق مەيرامعا ۇلەس قوسايىق، ەلدىڭ كوڭىلىن كوتەرەيىك دەگەن نيەتپەن كونسەرت وتكىزۋدى ۇيعاردىق»، - دەدى ءانشى.
مەرەكەلىك كونسەرتتە ونەرسۇيەر قاۋىم ءان پاديشاسى قازاق، ورىس، تاتار تىلدەرىندە جاندى داۋىستا ءان شىرقاپ، وپەرا ۇزىندىلەرىن ورىندادى.
سونداي- اق ساحنا تورىندە بيبىگۇل تولەگەنوۆانىڭ شاكىرتتەرى - تولقىن زابيروۆا، تالعات مۇسابايەۆ، الفيا كارىموۆا، ازامات جىلتىركوزوۆ، جۇپار عابدۋللينا، دينا حامزينا، مەدەت شوتابايەۆ، «دارىن» مەملەكەتتىك جاستار سىيلىعىنىڭ لاۋرەاتى - مالىك ازات سىندى جاس وپەرا جۇلدىزدارى ونەر كورسەتتى. كونسەرتتى استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ سيمفونيالىق وركەسترى سۇيەمەلدەدى.
«بارلىعى مەنىڭ رۋحاني بالالارىم، شاكىرتتەرىم. بۇلار شىققاندا ءالى كۇنگە دەيىن تاقىمىمدى قىسىپ وتىرامىن، ۋايىمدايمىن. ولارعا مەنىڭ جولىمدى بەرسىن. ەلىمىز امان بولسىن، استانامىز كوركەيە بەرسىن، وسىنداي قۋانىشتى كەزدەسۋلەرگە ەشتەڭە بوگەت جاساماسىن»، - دەپ تىلەك ءبىلدىردى بيبىگۇل تولەگەنوۆا.
اۆتور: ايجان سەرىكجان قىزى