مينيستر ابايەۆ: قازاقستان حالقىنىڭ 88 پايىزى وتاندىق تەلەارنالاردى كورىپ وتىر
بۇل تۋرالى بۇگىن پارلامەنت ماجىلىسىندەگى ۇكىمەت ساعاتىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ ءمالىم ەتتى، دەپ حابارلايدى قازاقپارات.
«ەسەپتەۋلەر ناتيجەسىنە سايكەس، تەلەاۋديتوريانىڭ 88 پايىزى قازاقستاندىق ارنالاردى تاڭدايدى. سونىمەن بىرگە ولاردىڭ 53 پايىزى ارنالارىمىزدى كۇندەلىكتى كورۋدە. ءبىزدىڭ ماقسات بۇل كورسەتكىشتى ارتتىرۋعا نەگىزدەلگەن، سەبەبى قازىرگى زامانعى الەمدە تەلە-راديو حابار تاراتۋ قوعامداعى وڭتايلى وزگەرىستەردىڭ كاتاليزاتورلارىنىڭ ءبىرى بولىپ تابىلادى»، - دەدى مينيستر.
ونىڭ سوزىنە قاراعاندا، مينيسترلىكتىڭ تاپسىرىسى بويىنشا اۋقىمدى الەۋمەتتىك زەرتتەۋ جۇرگىزىلىپ، بۇل شارا قازاقستاندىقتاردىڭ مەديا-تاڭداۋىن انىقتاۋعا باعىتتالدى. الىنعان قولدانبالى مالىمەتتەردىڭ نەگىزىندە ب ا ق- تى مودەرنيزاتسيالاۋ مەن ۇلتتىق اقپاراتتىق كەڭىستىكتى جۇيەلەۋدىڭ نەگىزگى جوبالارى قالىپتاستىرىلدى. ونىڭ ىشىندە «حاباردىڭ» ۇستانىمى وزگەردى. «24kz» «حابار 24» تەلەارناسى بولىپ رەبرەندينگ جۇرگىزىلدى، «Kazakh TV» تەلەارناسى «ءبىلىم جانە مادەنيەت» تەلەارناسىمەن بىرىكتىرىلدى. سونىمەن قاتار «Kazsport» تەلەارناسى زاماناۋي HD فورماتقا كوشىرىلدى، مۇنىمەن قوسا «قازاق راديوسى»، «شالقار» جانە «Classic» راديولارىنىڭ قامتۋ اۋماعى كەڭەيتىلدى.