بۇل تۋرالى ق ر ءى ءى م ىشكى ىستەر مينيسترلىگى كوشى-قون قىزمەتى كوميتەتىنىڭ باستىعى، پوليتسيا پولكوۆنيگى سابىرجان سەيتجانوۆ ايتتى، دەپ حابارلايدى قازاقپارات ءتىلشىسى.
«ەلىمىزدىڭ ءار جەرىندە قۇجاتسىز تۇرىپ جاتقان ادامدار انىقتالىپ جاتىر. وسىعان وراي ءمينيسترىمىزدىڭ تىكەلەي تاپسىرماسىمەن بيىل ارنايى اكسيا ۇيىمداستىرىپ جاتىرمىز. ستاتيستيكاعا كوز سالار بولساق، 2019 -جىلى «قىزىل تولقۇجاتپەن» (ك س ر و ءتولقۇجاتى) جۇرگەن 1727 ادام قۇجاتتاندىرىلدى. بيىل 8 ايدا 867 ادام انىقتالىپ، جاڭا قۇجاتىن الدى»، - دەدى كوميتەت باستىعى ءى ءى م-نىڭ Facebook پاراقشاسىندا وتكەن بريفينگ بارىسىندا.
مىسالى ونىڭ ايتۋىنشا، قوستاناي وبلىسىندا ءبىر ەر ادام 30 جىل بويى قۇجاتسىز تۇرعان. ونى ىشكى ىستەر ورگاندارىنىڭ قىزمەتكەرلەرى انىقتاپ، ءتيىستى كومەك بەرگەن.
«قازىرگى ۋاقىتتا ول جەكە كۋالىگىن الدى. تاعى ءبىر مىسالعا توقتالسام، قاراعاندى وبلىسىندا 46 جاستاعى ايەل مەن ونىڭ ۇلى ۇزاق ۋاقىت بويى جەكە باسىن كۋالاندىراتىن قۇجاتسىز ءومىر سۇرگەن. بۇگىندە ءبىزدىڭ قىزمەتكەرلەر ءتيىستى سۇراۋ حاتتارىن جولداپ، ولاردىڭ قاي جەردە تۋعانىن، تۇرعانىن انىقتاپ جاتىر. ال الماتى وبلىسىندا كوشى-قون قىزمەتى قىزمەتكەرلەرى وڭىردە تۇراتىن ءۇش قارت ادامعا العاش رەت جەكەباستارىن كۋالاندىراتىن قۇجاتتارىن بەرەدى. ونىڭ ءبىرىنىڭ ءوز ازاماتىمىز ەكەندىگىن انىقتاپ جەكە كۋالىك بەرسەك، ەكىنشىسىنە ازاماتتىعى جوق كۋالىگىن تابىستادى. ال ءۇشىنشى قارت ادام رەسەي ازاماتى بولىپ شىقتى. وعان ىقتيارحات راسىمدەدىك»، - دەدى سابىرجان سەيىتجانوۆ.
اۆتور: مارلان جيەمباي