ەڭ تومەنگى ايلىقتى 85 مىڭ تەڭگەگە جەتكىزۋ جالپى ەڭبەكاقىنىڭ وسۋىنە تۇرتكى بولادى - ساتىبالدى داۋلەتالين
«ەكونوميكا ميلليونداعان ەڭبەك ادامدارىنىڭ قاتىسىنسىز دامىمايدى. سوندىقتان، ەڭبەك قاتىناستارى مەن الەۋمەتتىك پروبلەمالار ەلدىڭ ەكونوميكالىق كورسەتكىشتەرىمەن بىرگە شەشىلىپ وتىرۋى كەرەك.
2 ميلليون ادامنىڭ ەڭبەك مۇددەسىن قورعايتىن قازاقستان كاسىپوداقتار فەدەراتسياسى ءۇشىن جولداۋداعى ەڭ تومەنگى ايلىق مولشەرىن 85 مىڭ تەڭگەگە جەتكىزۋ تۋرالى تاپسىرماسى ايرىقشا بولدى. بۇل تاپسىرما 2024 -جىلدىڭ 1 -قاڭتارىنان باستاپ ىسكە اسادى جانە قازاقستاندىقتاردىڭ ەكونوميكالىق قابىلەتىن ارتتىرادى. ەڭ تومەنگى ايلىقتىڭ ءوسۋى جالپى ەڭبەككە تولەنەتىن اقىنى ارتتىرۋعا تۇرتكى بولادى. سونىمەن بىرگە، كولەڭكەلى ەڭبەكاقىلاردى جارىققا شىعۋعا ىنتالاندىرادى»، - دەيدى ۇيىم باسشىسى.
جولداۋدا 2030 -جىلعا دەيىنگى ەڭبەك قاۋىپسىزدىگىنىڭ تۇجىرىمداماسى قابىلداناتىنى ايتىلدى. ساتىبالدى داۋلەتالين وسى قۇجاتتىڭ جوباسىن ازىرلەۋگە بەلسەندى اتسالىسۋعا دايىن ەكەندەرىن جەتكىزدى.
«كەيىنگى بەس جىلدا وندىرىستەگى جاراقاتتانۋ ديناميكاسى تومەندەگەنىنە قاراماستان، جاعداي جاعىمسىز كۇيدە قالىپ وتىر. جىل سايىن وندىرىستە 200 ادامنىڭ ءومىرى قيىلادى جانە 1000-نان استام ادام زارداپ شەگەدى.
ەڭبەك قورعاۋ سالاسىنداعى وتەماقىعا نەگىزدەلگەن باسقارۋ مودەلى بولار ءىس بولعاننان كەيىن ارەكەت ەتۋگە باعىتتالعان. ناقتى شەشىم تەكسەرۋلەر قورىتىندىسىنان كەيىن عانا شىعارىلادى. سيفرلىق ەكونوميكا جاعدايىندا مۇنداي مودەل جۇمىس ىستەمەيدى. بىزگە قۇبىلمالى جاعدايعا قاراي جىلدام ارەكەت ەتەتىن مودەل كەرەك. وسى تۇرعىدان العاندا ەڭبەك قاۋىپسىزدىگىنىڭ جاڭا تۇجىرىمداماسى قاجەت- اق»، - دەيدى فەدەراتسيا جەتەكشىسى.
ۇيىم باسشىسى كەيبىر سالا ماماندارىنا 55 جاسقا كەلگەننەن كەيىن زەينەتكە شىققانشا ارنايى الەۋمەتتىك تولەماقى بەرۋ شاراسىنىڭ ەنگىزىلۋى دە ەڭبەك نارىعىنداعى جاعدايعا وڭ اسەر ەتەدى دەپ وتىر.
«پرەزيدەنت ايتقان ماماندار تاپشىلىعى شىنىمەن دە وزەكتى ماسەلە. ول ءۇشىن كاسىپتىك ءبىلىم بەرۋ جۇيەسىن زاماننىڭ ىڭعايىنا، ءار سالاداعى جاڭاشىلدىقتارعا بەيىمدەي ءتۇسۋ قاجەت»، - دەيدى ساتىبالدى داۋلەتالين.
اۆتور:
ەسىمجان ناقتىباي