اسكەري ۇلتتىق ۇلاننىڭ 85 جاۋىنگەرى اسكەري انت قابىلدادى - فوتو
ىشكى اسكەردىڭ جاۋىنگەرلىك جولىن جالعاۋشى ۇلتتىق ۇلان ەلىمىزدىڭ ىشكى ءتارتىبى مەن قوعامدىق قاۋىپسىزدىگى جولىندا وزىنە جۇكتەلگەن مىندەتتەردى ابىرويمەن اتقارىپ كەلەدى.
وسى جىلدىڭ جازىندا ازاماتتىق بورىشىن وتەۋگە كەلگەن جاس ساربازدار وتان قورعاۋشىلارمەن تەڭ دارەجەدە ساپقا تۇرۋ ءۇشىن ءبىر ايدان اسا ۋاقىت ارنايى دايىندىق كۋرسىنان ءوتتى. بۇگىن الماتى جانە جامبىل وبلىستارىنان شاقىرىلعان 85 جاۋىنگەر قازاقستان حالقىنا ادال بولۋعا، ونىڭ زاڭدارىن مەن ۇلتتىق قۇندىلىقتارىن قاستەرلەپ-ساقتاۋعا انت بەردى.
سالتاناتتى شاراعا ۇلتتىق ۇلان باس قولباسشىلىعىنىڭ، ءوزارا ءىس- قيمىل جاسايتىن ورگانداردىڭ، «نۇر وتان» پارتياسى جانىنداعى «جاس وتان» جاستار قاناتىنىڭ وكىلدەرى، ارداگەرلەر مەن ساربازداردىڭ اتا- انا، تۋعان- تۋىستارى قاتىستى، دەپ حابارلايدى ۇلتتىق ۇلاننىڭ باسپا ءسوز قىزمەتىنەن.
ساربازدار ساپ تۇزەگەن الاڭعا جاۋىنگەرلىك تۋ كىرگىزىلىپ، مەملەكەتتىك ءانۇران ورىندالدى. اسكەري ءبولىم كومانديرى پولكوۆنيك مارات ءارىنوۆ جاس شاقىرىلىمدى قۇتتىقتاپ، كومانديرلىك ءسوزىن ارنادى: «قۇرمەتتى جاۋىنگەرلەر! اسكەرىمىزدىڭ باتىرلارى، وتان ءۇشىن جانقيارلىق ارەكەت تانىتقان - ەربول وتاربايەۆ، جاندوس بايانبايەۆ، حالىق قاھارمانى قايرات ۇمبەتوۆ، كەشە عانا اقتوبەدەگى قاندى وقيعادا جان قيعان دانيەل مايلىبايەۆ، دوسبول ساپاردىڭ ەرلىگى ەشقاشان ۇمىتىلمايدى. سىزدەر دە ەلگە ابىرويمەن قىزمەت ەتۋگە سەرت بەرىپ وتىرسىزدار. وسى جولدا قاجىماس قاجىر- قايرات، بەيبىت اسپان تىلەيمىن»، - دەدى ول.
ۇلكەن ومىرگە قادام باسقان وتان قورعاۋشىلاردى «نۇر وتان» پارتياسى جانىنداعى «جاس وتان» جاستار قاناتى استانا فيليالى كەڭەسىنىڭ مۇشەسى بيداۋلەت بيمانوۆ، ارداگەرلەر كەڭەسى ءتوراعاسىنىڭ ورىنباسارى زاپاستاعى پراپورشيك ۆياچەسلاۆ بىرسان، قاتارداعى جاۋىنگەر شىلدەبايەۆتىڭ اناسى جامبىل وتەبايەۆا، جاس سارباز باكىردىڭ اكەسى زاكىر يبراگيموۆ تە قۇتتىقتادى.
ۇلتتىق ۇلان باس قولباسشىسى گەنەرال- لەيتەنانت رۋسلان جاقسىلىقوۆتىڭ اتىنان تاربيە جانە الەۋمەتتىك- قۇقىقتىق جۇمىستار باس باسقارماسىنىڭ باستىعى پولكوۆنيك ساۆەردين يميروۆ اتا- انالاردى ۇلدارىنىڭ ساپقا تۇرۋىمەن قۇتتىقتادى.
«ءبىز، تۇراقتىلىق پەن وركەنيەتتى كوكسەگەن ۇلى دالا ەلىمىز. مەن ءوز وتانىن قورعاۋدى، قازاقستان حالقىن قورعاۋدى، ءوز جانۇياسىن قورعاۋدى پەرزەنتتەرىنە سەنىپ تاپسىرعان اتا- انالارعا العىس ايتقىم كەلەدى. باقىتىمىزعا وراي، تىنىشتىق پەن كەلىسىم، بىرلىك ورناعان بەيبىت ەلدە ءومىر سۇرۋدەمىز. الايدا، مەملەكەت ىشىنە ىرىتكى سالۋدى كوزدەگەن قوسالقى كۇشتەر باردا قاۋىپ تە جوق ەمەس. سوندىقتان، ۇلتتىق ۇلان ءبىرتۇتاس جاۋىنگەرلىك كۇش رەتىندە ەلىمىزدىڭ تىنىشتىعىن كۇزەتۋى ءتيىس. وتان قورعاۋشى اتىنا كىر كەلتىرمەي، ازاماتتىق بورىشتارىڭىزدى ابىرويمەن، اسقان جاۋاپكەرشىلىكپەن وتەۋلەرىڭىزگە تىلەكتەسپىن!» - دەدى باس باسقارما باسشىسى.
انت قابىلداۋ ءراسىمى اياقتالعان سوڭ، اتا- انالار ساربازداردىڭ جاتىن ورنىمەن، اسكەردىڭ تىنىس- تىرشىلىگىمەن تانىسىپ، ۇلدارىمەن جۇزدەسىپ، سەيىلدەۋگە مۇمكىندىك الدى.
وسى كۇنى ۇلتتىق ۇلانعا قاراستى 6636 اسكەري ءبولىمىنىڭ دە 270 كە جۋىق جاۋىنگەرى اسكەري انت قابىلداپ، جەكە قۇرام سانىن تولىقتىردى.