سيريادا حيميالىق شابۋىل قۇرباندارىنىڭ سانى 84 كە جەتتى

استانا. قازاقپارات - سيريادا حيميالىق شابۋىل قۇرباندارىنىڭ سانى 84 كە جەتتى. تاعى 550-گە جۋىعى جاراقات العان. دۇنيەجۇزىلىك دەنساۋلىق ۇيىمى وسىنداي دەرەك جاريالادى.

بۇگىن تاڭەرتەڭ ا ق ش سيريا قارۋلى كۇشتەرى ءوز ازاماتتارىن ۋلى گازبەن قىردى دەپ، حومس پروۆينتسياسىنداعى اۋە بازاسىن اتقىلادى. ۆاشينگتوننىڭ بۇل شەشىمىن فرانسيا، گەرمانيا،  ۇلى بريتانيا، تۇركيا، اۆستراليا قولداپ وتىر. ال قىتاي، اۆستريا، يتاليا، رەسەي قاتاڭ سىنادى.

نە دەسەك تە، الەمدەگى ۋشىققان احۋال، مۇناي نارىعىنا وڭ ىقپال ەتتى. بۇگىن برەنت ماركالى قارا التىن باررەلىنە 56 دوللارعا دەيىن قىمباتتادى. وپەراتسيا كەزىندە سيريا جەرىنە ا ق ش جاۋىنگەرلەرىنىڭ تابانى تيگەن جوق. جەرورتا تەڭىزىنە ەكى كەمە جەتكىزىلىپ، 60-تاي زىمىران ۇشىرىلىپ، سيريا قارۋلى كۇشتەرىنىڭ اۋە بازاسى اتقىلاندى.

الي مايحۋب، سيريا قارۋلى كۇشتەرىنىڭ وكىلى:

 - ا ق ش جاساعان اۋە سوققىدان 6 ادام قازا بولدى. جاراقات العاندار دا بار. سونىمەن قاتار ۇلكەن ماتەريالدىق شىعىن اكەلدى.

 باشار اساد حيميالىق قارۋ قولدانىپ، بەيبىت تۇرعىنداردى قىرعانى ءۇشىن سازايىن تارتۋى كەرەك. دونالد ترامپتىڭ بۇيرىق بەرۋىنە قاتىستى ايتقان ءسوزى وسى.

 دونالد ترامپ، ا ق ش پرەزيدەنتى:

 - ا ق ش حيميالىق قارۋعا سالىنعان تىيىمنىڭ ساقتالۋىن كوزدەيدى. ال سيريا بىرىككەن ۇلتتار ۇيىمىنىڭ بۇل كونۆەنتسياسىن بۇزدى. باشار اساد ساياساتىنا ىقپال ەتۋ مۇمكىن بولماي تۇر. سوندىقتان الەم قاۋىمداستىعىن سيرياداعى قاندى قىرعىندى توقتاتۋ ءۇشىن بىزگە قوسىلۋعا شاقىرامىن.

 پەنتاگون سيريا ارمياسىنىڭ حيميالىق قارۋ قولدانعانىنا دالەل رەتىندە مىنا كارتانى جاريالادى. وعان جۇگىنسەك، بارلاۋشىلار حان- شەيحۋن قالاسىن بومبىلاعان ۇشاقتار وسى اۋە بازاسىنان ۇشىرىلعانىن انىقتاعان. ءبىراق رەسەي: «ا ق ش ۋلى گازدى كىم قولداندى دەگەن ساۋالعا جاۋاپ ىزدەمەستەن، ويدان شىعارىلعان دەرەكتەر بەرىپ وتىر. بۇل 2003 -جىلى امەريكانىڭ يراكقا سوعىس اشقان كەزدەگى سسەناريدى ەسكە سالادى»، -  دەيدى.

ماريا زاحاروۆا، ر ف سىرتقى ىستەر مينيسترلىگىنىڭ رەسمي وكىلى:

 - ا ق ش اۋەدەن سوققى بەرۋ تۋرالى شەشىمدى كەشە عانا قابىلداعان جوق. بۇرىننان جوسپارلاعانى كورىنىپ تۇر. يدليبتەگى حيميالىق شابۋىل تەك سىلتاۋ، باسقا ەشتەڭە ەمەس.

 سيريا ۇكىمەتى بولسا، اۋە سوققىسىن اگرەسسيالىق ارەكەت دەپ اتادى.

تالال بارازي، حومس پروۆينتسياسىنىڭ گۋبەرناتورى:

- سيرياعا شابۋىل جاساپ جاتقان لاڭكەستەر كەيىن شەگىنە باستاعان ەدى. سوعىسقا سودىرلاردى قولدايتىنداردىڭ وزدەرى كيلىگە باستادى. ەگەر امەريكالىقتار تەررورشىلارعا كومەكتەسۋ ءۇشىن وسىندا جۇرسە، ءبىز تاڭ قالمايمىز.

قازىر سيرياداعى احۋالعا قاراپ، جەر ءجۇزى ەلەڭدەسىپ وتىر. ءبىرى سوعىس باستالادى دەسە، ەندى ءبىرى جانجال ءارى قاراي ورشىمەيتىنىنە سەنىمدى. ويتكەنى اۋە سوققىدان رەسەيلىك ساربازدار ءدىن امان. ا ق ش: «سيريانى اتقىلايتىنىن رەسەيگە الدىن الا ەسكەرتتىك»، -  دەيدى.

http://khabar.kz/kz/news