قازاقتار بالالارىنا قانداي ەسىم بەرىپ ءجۇر: 84 سەركان، 50 ەدا
ال قىزدارعا كوبىنە مەدينا مەن اسىلىم دەگەن ەسىم بەرىلەدى. بۇل - ۇلتتىق ستاتيستيكا بيۋروسىنىڭ مالىمەتتەرى. قوزىبايەۆ ۋنيۆەرسيتەتىنىڭ وقىتۋشىسى ورال قۇسايىنوۆ بالاعا ەسىم بەرۋدەگى ەرەكشەلىك تۋرالى ءتۇسىندىردى، - دەپ حابارلايدى «استانا» تەلەارناسى.
مامانداردىڭ ايتۋىنشا، قازىر بالالارىنىڭ ەسىمىن ءتۇرلى فيلمدەر مەن تەلەشوۋلارداعى سۇيىكتى كەيىپكەرلەرىنىڭ قۇرمەتىنە قوياتىندار كوبەيگەن. مىسالى، ەلىمىزدە ءتورت حيۋررەم، ەكى ماحيديەۆران جانە ءتورت مىڭعا جۋىق سۇلەيمەن بار. 84 ادامعا سەركان، ال 50 قىزعا ەدا ەسىمى بەرىلگەن. بۇل - تانىمال تۇرىك سەريالىنان كەيىن پايدا بولعان ترەند. بۇدان باسقا، «تاقتار ويىنى» سەريالىنان كەيىن توعىز قىزدىڭ ەسىمى - دەيەنەريس، 56 قىز - اريا.
«قازاقستان ەكى اعىمنىڭ ىقپالىندا: ءبىر جاعىنان وڭتۇستىكتەن كەلگەن يسلام ءدىنى. ءبىز ۇزاق ۋاقىت بويى يسلامنان الشاق بولدىق، قازىر بايلانىس ورناپ كەلە جاتىر جانە قازىر يسلامعا قاتىسى بار ەسىم وتە كوپ - نۇريسلام، مۇحامەد، ءالي. باتىستىڭ اسەرى دە بار - ءارتۇرلى الينالار، سيۋزاننالار. بۇل - كوپولشەمدى اسەر. قازاقستان ءتىپتى بالاعا ەسىم بەرۋدە دە كوپۆەكتورلى»، - دەدى ورال قۇسايىنوۆ.
ساراپشى قازىر قازاق اتا-انالارىنىڭ ەسىم تاڭداۋدا الدەقايدا ەركىن ەكەنىن ايتادى. ال 70 جىل بۇرىن ولار تۇڭعىشىنا ءوز ەركىمەن ەسىم بەرە الاتىنىنا سەنبەس ەدى. تاريحشىنىڭ ايتۋىنشا، ەسىم بەرۋ ماسەلەسىندە ءتىپتى كەي دامىعان ەلدەردە دە كونسەرۆاتيۆ كوزقاراستار ساقتالعان.
«مىسالى، دانيادا اتا-انالار بەرۋگە قۇقىعى بار 4000 نان اسا رەسمي تىركەلگەن ەسىمدەردىڭ ءتىزىمى بار. ال ەگەر ەسىم بۇل تىزىمدە بولماسا، دەمەك بالاعا ونداي ات بەرۋگە اتا-انانىڭ قۇقىعى جوق. ەگەر اتا-انا بالاعا تىزىمدە جوق ەسىم بەرسە، ولار بەلگىلى ءبىر جاۋاپكەرشىلىكتى ءوز موينىنا الۋى كەرەك»، - دەدى ول.