وتاۋ قۇرۋ ەشقاشان كەش ەمەس: س ق و-دا بيىل 81 دەگى اتا ۇيلەنىپ، 82 جاستاعى اجەي كۇيەۋگە شىققان
س ق و ادىلەت دەپارتامەنتى باسپا ءسوز قىزمەتىنىڭ مالىمەتىنشە، بيىل شاڭىراق كوتەرگەن سەگىز جۇپتىڭ جاسى نەكە جاسىنان، ياعني 18 دەن تومەن بولعان.
بويجەتكەننىڭ جۇكتى بولۋىنا بايلانىستى ولاردىڭ نەكەسى تىركەلدى.
شەتەل ازاماتتارىمەن جىل باسىنان بەرى 60 نەكە تىركەلدى. بىلتىر ماماندار وسىنداي 210 جۇپقا قۇجات بەرگەن.
بىلتىر وبلىستا 729 جۇپ اجىراسسا، بيىل ولاردىڭ سانى - 228.
«بيىل اجىراسىپ جاتقان ەرلەردىڭ ورتاشا جاسى 41 بولسا، ايەلدەردە - 38. بىلتىر شاڭىراعى ورتاسىنا تۇسكەن ەر ادامداردىڭ ورتاشا جاسى 33, كەلىنشەكتەردە 32 بولدى. ال ۇيلەنگەندەردىڭ ورتاشا جاسىنا كەلەتىن بولساق، ەر ادامداردا 34, ايەلدەردە 32 جاس. بۇگىندە جاستار شاڭىراق كوتەرۋگە اسىقپايتىن بولعان. ماسەلەن، وسىدان 10 جىل بۇرىن جىگىتتەر 29 دا ۇيلەنسە، قىزدار 27 جاسىندا تۇرمىس قۇرعان»، - دەيدى س ق و ادىلەت دەپارتامەنتىنىڭ باس مامانى ەميليا زۋيەۆيچ.
بيىل وتاۋ قۇرىپ، نەكەسىن تىركەتكەندەردىڭ ەڭ ەگدە جاستاعىسى – 82 دە. ايەل ادام تۇرمىس قۇردى، ال 81 جاستاعى ەر ادام ۇيلەنگەن.
«شەتەل ازاماتتارىنىڭ ىشىندە ءوڭىر تۇرعىندارى نەگىزىنەن رەسەيلىكتەرمەن نەكەگە وتىرادى. سونىڭ ىشىندە كورشى مەملەكەتتەن قالىڭدىق اكەلەتىن ەر ادامداردىڭ ۇلەسى جوعارى. ال اجىراسۋعا سەبەپتەر ءارتۇرلى، نەگىزگىلەرىنە توقتالار بولسام - مىنەزدىڭ جاراسپاۋى، سپيرتتىك ىشىمدىكتەرگە بەيىم بولۋ، ەرلى-زايىپتىلاردىڭ وپاسىزدىعى. ءبىر جاعدايدا ەگدە جاستاعى ەرلى-زايىپتى ورتاق كەلىسىمگە كەلە الماي اجىراسىپ كەتتى، ايەلى قالادا بالالارىمەن تۇرعىسى كەلگەن، كۇيەۋى اۋىلدان كوشۋگە باس تارتقان. ال جاستاردىڭ اراسىندا اجىراسۋعا اكەلگەن ەرەكشە سەبەپ - ايەلى كۇيەۋىن «الفونس» دەپ كورسەتكەن»، - دەيدى ەميليا زۋيەۆيچ.