تەل-اۆيۆتە 80 مىڭ ادام سوت جۇيەسىن قايتا قاراۋعا قارسى شەرۋگە شىقتى
پوليتسيانىڭ مالىمەتىنشە، الاڭ مەن ونىڭ ماڭىنداعى كوشەلەرگە 80 مىڭعا جۋىق ادام جينالدى، ولاردىڭ كوپشىلىگى تەل-اۆيۆكە ەلدىڭ تۇكپىر-تۇكپىرىنەن جالعا الىنعان اۆتوبۋستارمەن كەلگەن. شەرۋلەر يەرۋساليم مەن حايفادا دا ءوتتى.
پوليتسيانىڭ ەسكەرتۋىنە جانە ۇلتتىق قاۋىپسىزدىك ءمينيسترى يتامار بەن-گۆيردىڭ تارتىپسىزدىكتەردى جويۋعا شاقىرعانىنا قاراماستان، دەمونسترانتتار مەن ساقشىلار اراسىنداعى بىرنەشە قاقتىعىستاردى ايتپاعاندا، جالپى نارازىلىق بەيبىت تۇردە اياقتالدى. نارازىلىق بىلدىرۋشىلەردىڭ قولدارىندا «قىلمىستىق ۇكىمەت»، «دەموكراتيانىڭ اياقتالۋى» جانە باسقا دا ۇراندار جازىلعان يزرايل جالاۋلارى مەن ترانسپارانتتار بار.
بەنيامين نەتانياحۋ باستاعان يزرايلدىڭ جاڭا ۇكىمەتى ەكى اپتادان استام ۋاقىت بويى بيلىكتە. ساياساتكەر ەلدىڭ زاڭ جۇيەسىن قايتا قاراۋدى كۇن تارتىبىندەگى باستى ماسەلە ەتىپ قويدى. بۇل قادام، بەلسەندلەردىڭ پىكىرىنشە، ەلدەگى تەجەۋ مەن تەپە-تەڭدىكتىڭ دەموكراتيالىق جۇيەسىن جويادى.
ادىلەت ءمينيسترى ياريۆ ليەۆين بۇعان دەيىن سوت جۇيەسىن قايتا قاراۋدى ۇسىنعان بولاتىن. جاڭا باستاما ءيزرايلدىڭ جوعارعى سوتىنىڭ سوت باقىلاۋىنا جانە سۋديالاردى تاعايىنداۋعا ساياسي باقىلاۋدى شوعىرلاندىرۋعا ارنالعان وكىلەتتىكتەرىن شەكتەيدى.
ليەۆيننىڭ پىكىرىنشە، سوتتار شەكتەن تىس وكىلەتتىكتەرگە يە بولىپ، سايلاۋشىلاردىڭ ەركىنە قارسى شەشىمدەر قابىلدايدى.
ال بيلىك جوسپارىنا قارسىلار ۇسىنىلعان وزگەرىستەر يزرايلدىك دەموكراتياعا نۇقسان كەلتىرەدى دەپ مالىمدەيدى. يزرايل وپپوزيتسياسىنىڭ جەتەكشىلەرى، بۇرىنعى باس پروكۋرورلار جانە يزرايلدىڭ جوعارعى سوتى بۇل جوسپارعا قارسى.
نەتانياحۋ جۇمادا: «ءبىز مۇنى سايلاۋ الدىندا تالقىلادىق جانە بۇنى جاساۋعا جۇرتشىلىقتان ناقتى ماندات الدىق. مەن بارلىعىنا سابىرعا كەلىپ، مازمۇندى پىكىرتالاسقا كىرىسۋدى ۇسىنامىن»، - دەدى.
ايتا كەتەيىك، نەتانياحۋدىڭ ءوزى 2016 -جىلدان بەرى سوت تەرگەۋىندە بولدى، وعان ءالى دە سىبايلاس جەمقورلىق جانە قىزمەتتىك وكىلەتتىگىن اسىرا پايدالاندى دەگەن ايىپ تاعىلىپ وتىر.
ەندى سوت جۇيەسىندەگى وزگەرىستەر نەتانياحۋعا سوتتالۋدان قۇتىلۋعا نەمەسە ءتىپتى ونىڭ سوت پروتسەسىن تولىعىمەن جويۋعا كومەكتەسۋى مۇمكىن. 2019 -جىلى ايىپ تاعىلعان سوڭ، نەتانياحۋ سوت تورەلىگى وعان ءبىرجاقتى قارسى ەكەنىن ايتتى.
نارازىلىق اكتسياسىنا قاتىسقانداردىڭ اراسىندا ءيزرايلدىڭ ءارتۇرلى پارتيالارىنىڭ، ونىڭ ىشىندە وپپوزيتسيانىڭ بۇرىنعى جەتەكشىلەرى دە بار.