ۆلاديمير پۋتين ەلباسىنى 80 جىلدىق مەرەيتويىمەن قۇتتىقتادى
رەسەي فەدەراتسياسىنىڭ پرەزيدەنتى ۆلاديمير پۋتين ەلباسىنا ارنايى بەينەقۇتتىقتاۋ جولدادى.
«مەن ءبىزدىڭ كوپجىلدىق دوستىعىمىزدى قادىرلەيمىن جانە ماقتان تۇتامىن. العاشقى كەزدەسۋىمىزدەن باستاپ ارامىزدا اشىقتىعىمەن جانە كەز كەلگەن كۇردەلى ماسەلەلەردى بىرلەسىپ شەشۋگە دايىن بولۋىمىزبەن ەرەكشەلەنەتىن شىنايى جولداستىق قارىم-قاتىناس ورنادى. ءسىزدىڭ دانالىعىڭىز بەن كورەگەندىگىڭىزدى، زور جاۋاپكەرشىلىگىڭىز بەن سالماقتىلىعىڭىزدى، ومىرلىك جانە باسقارۋ تاجىريبەڭىزدى بارشا جۇرت مويىندادى. ءسىز ءوز ەلىڭىزدە جانە رەسەيدە، سونداي-اق بۇكىل الەمدە كورنەكتى مەملەكەت قايراتكەرى جانە ناعىز كوشباسشى رەتىندە جوعارى بەدەلگە يە بولدىڭىز. وسى جىلداردىڭ ىشىندە ءسىز ۇلتتىق كەلىسىمدى، تاريحي، مادەني داستۇرلەردى ساقتاي وتىرىپ، قازاقستاننىڭ تۇراقتى دامۋىنا، بولاشاققا نىق سەنىممەن قادام باسۋىنا زور ەڭبەك ءسىڭىردىڭىز»، - دەدى ۆلاديمير پۋتين.
وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ ءوز حاتىندا مەملەكەت باسشىسى رەتىندەگى ۇزاق مەرزىمدى جانە جەمىستى قىزمەتى بارىسىندا ەلباسى تەك قازاقستاندا عانا ەمەس، حالىقارالىق ارەنادا دا زور قۇرمەت پەن بەدەلگە يە بولعانىن اتاپ ءوتتى.
«ءسىز ەڭ كۇردەلى تاريحي كەزەڭدە ەلدى ءتيىمدى باسقاردىڭىز، قازاقستاننىڭ جاڭا تاريحى مەن تاعدىرى ءسىزدىڭ اتىڭىزبەن تىعىز بايلانىستى. زور كۇش-جىگەرىڭىزدىڭ، پاراساتتى جانە كورەگەن باسشىلىعىڭىزدىڭ ارقاسىندا قازاقستان رەسپۋبليكاسى ءوزىنىڭ ۇلكەن ەكونوميكالىق جانە زياتكەرلىك الەۋەتىن ءتيىمدى پايدالانىپ، بۇگىندە الەمدەگى ەڭ قارقىندى دامىپ كەلە جاتقان ەلدەردىڭ بىرىنە اينالدى»، - دەلىنگەن جەدەلحاتتا.
يسپانيا كورولى فەليپە جەدەلحاتىندا نۇرسۇلتان نازاربايەۆتىڭ قازاقستان رەسپۋبليكاسىنىڭ قالىپتاسۋى مەن دامۋىنا، حالىقتىڭ ءال-اۋقاتىن قامتاماسىز ەتۋگە قوسقان ۇلەسىن ەرەكشە اتاپ ءوتتى.
«وسى مۇمكىندىكتى پايدالانا وتىرىپ، سىزگە يسپانياعا دەگەن ەرەكشە كوڭىلىڭىز بەن ءبىزدىڭ ەلدەرىمىزدىڭ اراسىنداعى بەرىك قاتىناستارعا قول جەتكىزۋگە قوسقان جەكە ۇلەسىڭىز ءۇشىن العىس ايتامىن. سونداي-اق سىزگە زور قۇرمەتىمدى بىلدىرەمىن»، - دەلىنگەن يسپانيا كورولىنىڭ قۇتتىقتاۋىندا.
موناكو كنيازى II البەر ەلباسىن مەرەيتويىمەن قۇتتىقتاپ، نۇرسۇلتان نازاربايەۆقا جانە قازاقستان حالقىنا مىقتى دەنساۋلىق پەن باق-بەرەكە تىلەدى.
مولدوۆا رەسپۋبليكاسىنىڭ پرەزيدەنتى يگور دودون قازاقستاننىڭ تۇڭعىش پرەزيدەنتىنىڭ جوعارى ساياسي بەدەلى الداعى ۋاقىتتا دا ەلدىڭ تۇراقتى دامۋىنا قىزمەت ەتەتىنىنە سەنىم ءبىلدىردى.
چەحيا رەسپۋبليكاسىنىڭ پرەزيدەنتى ميلوش زەمان ءوزىنىڭ جەدەلحاتىندا نۇرسۇلتان نازاربايەۆتىڭ تاۋەلسىز قازاقستاننىڭ دامۋى جولىنداعى سىڭىرگەن ەڭبەگىن اتاپ ءوتتى.
«30 جىلدىڭ ىشىندە ءسىزدىڭ باسشىلىعىڭىزبەن قازاقستان كوپتەگەن جەتىستىككە قول جەتكىزدى. ءبىزدىڭ ەلدەرىمىزدىڭ اراسىندا ۇزاق ۋاقىتتان بەرى دوستىق قارىم-قاتىناستىڭ جالعاسىپ، كوپتەگەن سالالارداعى ىنتىماقتاستىق ەكى جاققا دا پايداسىن تيگىزە وتىرىپ، دامىپ جاتقاندىعىنا وتە قۋانىشتىمىن»، - دەلىنگەن ميلوش زەماننىڭ جەدەلحاتىندا. اۋعانستان يسلام رەسپۋبليكاسىنىڭ پرەزيدەنتى اشراف عاني ءوز جەدەلحاتىندا ەلباسىنىڭ ەكىجاقتى قاتىناستاردى دامىتۋعا جانە مەملەكەتارالىق ىنتىماقتاستىقتى نىعايتۋعا قوسقان ەرەكشە ۇلەسىن اتاپ ءوتتى.
يزرايل مەملەكەتىنىڭ پرەمەر-ءمينيسترى بينيامين نەتانياحۋ ەلباسىن مەرەيتويىمەن قۇتتىقتاپ، ەكى ەل اراسىنداعى قاتىناستاردىڭ ودان ءارى نىعايا تۇسەتىنىنە سەنىم ءبىلدىردى.
«ءسىزدىڭ باسشىلىعىڭىزبەن قازاقستان رەسپۋبليكاسى كوپسالالى ەكونوميكاسى بار زاماناۋي، جارقىن ەلگە اينالدى. بۇل شىن مانىسىندە ورتالىق ازيا جانە ودان تىس جەرلەر ءۇشىن وتە ماڭىزدى فاكتور. مەن سىزگە ۇزاق عۇمىر، دەنساۋلىق پەن باق-بەرەكە تىلەيمىن»، - دەلىنگەن جەدەلحاتتا.