دۋباي اۋەجايىندا 80 قازاقستاندىق ەلگە ۇشاتىن رەيستەن ءتۇسىرىلدى

شىمكەنت. قازاقپارات - ەلىمىزدىڭ سىرتقى ىستەر مينيسترلىگى بىرىككەن اراب امىرلىكتەرىنەن ۇشىپ كەلە الماي قالعان شىمكەنتتىكتەرگە قاتىستى تۇسىنىكتەمە بەردى.

مينيسترلىكتىڭ رەسمي وكىلى ايبەك سمادياروۆ شەتەلگە بارعان 80 ازاماتتىڭ ماسەلەسى ەرەكشە باقىلاۋعا الىنعانىن ايتادى، دەپ حابارلايدى قازاقپارات ءتىلشىسى.

«ءبىزدىڭ دۋبايداعى ديپلوماتتار بۇل ماسەلەنى ەرەكشە باقىلاۋعا العان. ازىرگە ونداعى ازاماتتاردان ارىز-شاعىمدار جوق. Fly Dubai اۋەكومپانياسىنىڭ مالىمەتىنشە، سۇرانىس بىلدىرگەن بارلىق جولاۋشىلار قوناق ۇيلەرگە ورنالاستىرىلعان. تاماقپەن قامتىلعان. اۋەكومپانيا تىعىرىقتان شىعۋ ءۇشىن جولاۋشىلاردى الماتى، بىشكەك جانە تاشكەنت ارقىلى جەتكىزۋدى جوسپارلاپ وتىر. ولاردىڭ بارلىعى ەرتەڭ نەمەسە ارعى كۇنى ەلگە جەتەدى دەپ كۇتىلۋدە»، - دەدى ايبەك سمادياروۆ.

ايتا كەتەيىك، دۋباي قالاسىنا بارعان 80 شىمكەنتتىك ەلگە جەتە الماي وتىر. جولاۋشىلاردىڭ سوزىنشە، ولار ۇشاققا وتىرعاندا بەلگىسىز ءبىر سەبەپتەرمەن رەيستەن ءتۇسىرىپ تاستاعان. سونان سوڭ، 6-7 ساعاتتاي اۋەجايدا كۇتۋگە ءماجبۇر بولعان.