«ناستوياشەە ۆرەميا» تەلەارناسىنىڭ حابارلاۋىنشا، قۇجات ءماتىنى 28 - قاراشادا وزبەكستاندىق ب ا ق- تا جاريالاندى.
قاۋلى وزبەكستاننىڭ العاشقى پرەزيدەنتى يسلام كاريموۆتىڭ «رەسپۋبليكانىڭ تاۋەلسىزدىك الۋىنا، ەلدىڭ قارىشتاپ دامۋىنا قوسقان تاريحي ەرەن ەڭبەگىن» ەسكەرىپ جانە ونى ماڭگى ەستە قالدىرۋ جۇمىستارىن جالعاستىرۋ ماقساتىندا قابىلدانعان.
كاريموۆتىڭ تۋعانىنا 80 جىل تولعانىن اتاپ وتۋدە جوسپارلانعان شارالار اراسىندا 2018 -جىلدىڭ قاڭتارىندا سامارقاندا كاريموۆتىڭ ەسكەرتكىش زيراتىن رەسمي تۇردە اشۋ، وعان ەلدىڭ وڭتۇستىك- باتىسىنداعى كارشي قالاسىندا ەسكەرتكىش ورناتۋ شارالارى بار.
سونىمەن قاتار كاريموۆتىڭ ءومىرى مەن قىزمەتى تۋرالى دەرەكتى فيلم ءتۇسىرۋ، وعان ارنالعان كىتاپتار (ونىڭ ىشىندە «وزبەكستان رەسپۋبليكاسىنىڭ العاشقى پرەزيدەنتى يسلام ابدۋعاني ۇلى كاريموۆ قىزمەتىنىڭ حرونيكاسى») مەن كاريموۆتىڭ ءوزى جازعان كىتاپتارىن شىعارۋ جوسپارلانعان. سامارقاندا بۇعان قوسا «يسلام كاريموۆ - تاۋەلسىز وزبەكستان مەملەكەتىن قۇرۋشى» دەپ اتالاتىن حالىقارالىق عىلىمي كونفەرەنسيا دا وتكىزىلمەك.
2018 -جىلدىڭ العاشقى توقسانىندا كاريموۆتى ەسكە الۋعا ارنالعان ەڭ ۇزدىك عىلىمي- تانىمدىق ماقالالار كونكۋرسىنىڭ قورىتىندىسى شىعارىلماق. ءبىلىم بەرۋ مەكەمەلەرىندە، اسكەري بولىمدەردە، ەڭبەك ۇجىمدارى مەن جەرگىلىكتى ءوزىن- ءوزى باسقارۋ ورگاندارىندا كاريموۆتى ەسكە الۋعا ارنالعان ادەبيەتشىلەر مەن عالىمداردىڭ كەزدەسۋلەرى وتكىزىلەدى.
كاريموۆ 1938 -جىلى 30 - قاڭتاردا تۋعان. ول وزبەكستاندى 1991 - جىلدان بەرى ۇزدىكسىز باسقارعان. رەسمي تاشكەنت ونىڭ قايتىس بولعانىن 2016 -جىلى 2 - قىركۇيەكتە حابارلادى.
www.azattyq.org