قىتايدا دينوزاۆردىڭ 80 جۇمىرتقاسىن ۇرلاپ كەتكەن
پروكۋراتۋرانىڭ مالىمەتى بويىنشا، قولعا تۇسكەندەردىڭ ءبىرى - ۋاڭ ساتىپ الۋشى رەتىندە جىجياڭ پروۆينتسياسىنداعى تيانتاي قالاسىندا تۇراتىن كوللەكسيونەردىڭ ۇيىنە بارعان.
9 - قاڭتاردا تۇندە ول ءوزىنىڭ ءۇش سىبايلاسىمەن بىرگە كوللەكسيونەردى توناپ، 80 دينوزاۆردىڭ جۇمىرتقاسىن الىپ كەتكەن، دەپ جازادى China Daily رەسمي ۇكىمەتكە سىلتەمە جاساپ.
ودان ءارى سىبايلاستار جۇمىرتقانى ءوزارا بولىسكەن. 27 داناسىن ۋاڭ العان. ۇرلانعان قۇندى زاتتاردى پوليتسيا حەيلۋنتسزيان پروۆينتسياسىنداعى حۋانان ۇەزىندە تۇراتىن ۋاڭنىڭ ءۇيىن تەكسەرۋ كەزىندە تاپتى. قالعاندارى دا قولعا ءتۇستى. ءبىراق 50 جۇمىرتقانىڭ تاعدىرى ازىرگە بەلگىسىز بولىپ وتىر.
حيلۇڭجياڭ پوليتسياسى ۋاڭنىڭ قاماۋدا ەكەندىگىن راستادى، ءبىراق قالعاندارى جايلى ايتۋدان باس تارتتى.
عالىمداردىڭ پىكىرىنشە، شىعىستاعى جىجياڭ پروۆينتسياسىندا ەجەلگى بور ءداۋىرى كەزەڭىندە ءتۇرلى دينازاۆرلار تىرشىلىك ەتكەن. بۇل اۋماقتا 6 جىل بويى 11 مىڭ شارشى مەتر اۋماقتا، 82 جەردە زەرتتەۋ جانە قازبا جۇمىستارى جۇرگىزىلگەن.
ارحەولوگيالىق جۇمىستار بارىسىندا كەم دەگەندە دينوزاۆردىڭ 8 ءتۇرىنىڭ قالدىقتارى جانە تاسقا اينالعان جۇمىرتقالاردىڭ 25 ءتۇرى تابىلعان.
«جىجياڭدا بور ءداۋىرى كەزەڭىندە، 65-145 ميلليون جىل بۇرىن اسا كوپ دينوزاۆرلار مەكەن ەتكەنى دالەلدەندى» ، - دەپ حابارلادى جىجياڭ جاراتىلىس تانۋ- تاريحي مۋزەيى تالىمگەرىنىڭ ورىنباسارى جين سينشەن.
قازىرگى ۋاقىتتا تاسقا اينالعان دينوزاۆر جۇمىرقالارىنىڭ ەڭ كوپ رەكوردتى تابىلۋى - گۋاڭدۇڭ پروۆينتسياسىنداعى حەيۋان قالاسىنىڭ ەنشىسىندە.
مۇندا 1996 -جىلدان بەرى 17 مىڭ تاسقا اينالعان قالدىقتار تابىلعان.
سودان دا بولار، حەيۋان قالاسىن عالىمدار «پالەونتولوگتار پەيىشى» دەپ اتايدى. تاسقا اينالعان دينوزاۆرلار عالىمداردى عانا ەمەس، كونترابانداشىلاردى دا قىزىقتىرۋدا. ولار شەتەلدىك كوللەكسيا جيناۋشىلارعا ساتۋ ءۇشىن ۇرلىققا بارادى.
اۆتور: ەرلان قوجاكەلديەۆ