الماتىدا حالىق جازۋشىسى قابدەش ءجۇمادىلوۆتىڭ 80 جىلدىق مەرەيتويى تويلانىپ جاتىر
مەرەيتوي يەسىنە قالا اكىمىنىڭ ورىنباسارى ارمان قىرىقپايەۆ الماتى اكىمى باۋىرجان بايبەكتىڭ قۇتتىقتاۋ ءسوزىن جەتكىزدى.
«قۇرمەتتى قازاق ونەرىن اسپەتتەر قاۋىم. ءبىز جاستارىمىزدىڭ كوبى كىتاپ وقىمايدى دەپ ءجيى ايتامىز. كىتاپ وقىمايتىن جاستاردان «قازاق ادەبيەتىنىڭ وكىلدەرى كىم؟» دەپ سۇراسا، جوق دەگەندە 10 ادامنىڭ اتىن اتايدى. سولاردىڭ ءبىرى قابدەش اعامىز. قازىرگى جاھاندانۋ زامانىندا بۇل ۇلكەن كورسەتكىش. اعامىز وسىعان ءوزىنىڭ ۇلكەن ەڭبەگىمەن، سەزىمتالدىعىمەن جەتتى. اكىم تارازي ايتقانداي، قابدەش ەكى جۇيەنىڭ دە تەگەۋرىنىن سەزگەن، سونىڭ ارقاسىندا ادەبي دارىنىن شىڭداعان ادام»، - دەدى قالا اكىمىنىڭ ورىنباسارى جازۋشىنىڭ يىعىنا شاپان جابا وتىرىپ.
مەرەيتويلىق كەشكە جازۋشىنىڭ دوستارى، قالامداستارى، مادەنيەت سالاسىنىڭ وكىلدەرى، جاستار جينالدى.
«كىم بىلمەيدى قابدەشتى؟
باسىنان تالاي ءحال كەشتى
سوڭعى كوشتى جازدى دا
باستاپ كەتتى بار كوشتى.
نار كوتەرمەس جۇك بار ما؟
توم كوتەرىپ شىقتى العا
جازعانىمەن دە، تۇرىمەن دە ۇقسايدى
مۇحتارعا!
قابدەشتىڭ ەرەكشەلىگى - ەڭ الدىمەن ول قالامگەرلىگىن اقىندىقتان باستاعان. «جاس ورەن» دەگەن ولەڭدەرى شىققان. كورگەنى ولەڭگە سيمايتىنىن ءبىلىپ، پروزاعا اۋىسقان. ولەڭنەن باستاعان سوڭ شىعارمالارىندا كوركەمدىك تۇنىپ تۇر. پروزاسىنىڭ ءوزى پوەزيا سياقتى. تۋما تالانت»، - دەدى قالامداسىن قۇتتىقتاۋعا كەلگەن بەلگىلى اقىن ورازاقىن اسقار.
كەشتە قابدەش ءجۇمادىلوۆتىڭ شىعارماشىلىعىنا ارنالعان دەرەكتى فيلم كورسەتىلدى.
سونداي-اق، مايرا ءىلياسوۆا، ءمادينا ءسادۋاقاسوۆا، «سازگەن سازى» انسامبلىنىڭ ورىنداۋىندا مەرەكەلىك كونسەرت بەرىلدى.
اۆتور: گۇلميرا عوسمانالي