بۇل كۇنى استانا قالاسى ورتا ءبىلىم بەرۋ مەكتەپتەرىنىڭ 80 ەڭ ۇزدىك جاس پاتريوتتارى ۇيىم قاتارىنا سالتاناتتى تۇردە انت بەرىپ، ۇيىم قاتارىنا قابىلداندى. ولار - رەسپۋبليكالىق، حالىقارالىق وليمپيادا، عىلىمي جوبالار، سپورت جانە ونەر بايقاۋلارىنىڭ جەڭىمپازدارى.
«وسىنداي ايتۋلى مەرەكەگە وراي «جاس ۇلان» ۇيىمىنا قابىلداۋداعى ماقساتىمىز - وقۋشىلاردى وتانشىلدىق پەن ۇلتجاندىلىققا تاربيەلەۋ، ەلى مەن جەرىنە دەگەن ماقتانىش سەزىمىن تەرەڭدەتۋ، وقۋشىلاردىڭ بويىنان ەڭبەككە، ىزدەنىسكە قۇلشىنىستارىن وياتىپ، كوشباسشىلىق قاسيەتتى دامىتۋعا ۇلەس قوسۋ»، - دەدى شارا بارىسىندا ۇيىمنىڭ استانا قالالىق فيليالىنىڭ اتقارۋشى حاتشىسى شۇعىلا قۇدايبەرگەنوۆا.
سالتاناتتى قابىلداۋ راسىمىنە استانا قالاسى ءبىلىم باسقارماسىنىڭ باسشىسى ە. سۋحانبەرديەۆا، ءماجىلىس دەپۋتاتى ز. ءجۇسىپوۆا، «جاس ۇلان» ءبىرىڭعاي بالالار مەن جاسوسپىرىمدەر ۇيىمى» رەسپۋبليكالىق قوعامدىق بىرلەستىگىنىڭ ءتورايىمى د. تايباسار قىزى قاتىستى.