يراكتىڭ سولتۇستىگىندە جاۋىنگەرلەر ەزيدتەر اۋىلىنا شابۋىل جاساپ، 80 ادامدى ءولتىردى

ءابۋ- دابي. قازاقپارات - «يراك پەن ليەۆانتتىڭ يسلام مەملەكەتى» كوتەرىلىسشى ۇيىمىنىڭ جاۋىنگەرلەرى يراكتىڭ سولتۇستىگىندەگى كوچو اۋىلىنىڭ بەيبىت تۇرعىندارىنا شابۋىل جاسادى. سالدارىنان ونداعان ادام قازا بولدى. ولاردىڭ كوبى ەزيدتىكتەر.

«سەكسەنگە جۋىق كۋرد- ەزيد ءولتىرىلدى. ولار حالىققا قارسى ۇلكەن قىلمىس جاسادى» ، - دەدى جەرگىلىكتى ب ا ق- قا بەرگەن سۇحباتىندا جوعارى شەندى شەنەۋنىك حوشيار زيباري.

اسكەري دەرەك كوزدەرىنە سۇيەنگەن ح. زيباري جاۋىنگەرلەردىڭ اۋىلعا ماشينالارمەن تۇستەن كەيىن كەلىپ، ادامداردى ولتىرە باستاعىنىن ايتتى. بەيبىت تۇرعىنداردى قىرۋ ءبىر ساعاتقا جالعاسقان. سەكسەن ەر ادامدى اتىپ ءولتىرىپ، ايەلدەر مەن قىزداردى تال افار قالاسىنا الىپ كەتكەن، دەپ قوستى يراك وكىلى.

كۋرد شەنەۋنىگى يراكتىڭ داحۋك پروۆينتسياسىندا قازا بولعاندار تۋرالى مالىمەتتەردى راستاپ، اۋىلداعى ءولى مايىتتەردى كوزىمەن كورگەنىن دە ايتتى.

ەزيدتەر - كۋردتاردىڭ ەتنوكونفەسسيونالدى توبى. ولار كۋرماندجيي تىلىندە سويلەيدى. نەگىزىنەن يراكتىڭ سولتۇستىگى مەن ەۋروپا ەلدەرىندە تۇرادى. ەزيدتەر زارواستريزممەن بايلانىستى ەجەلگى ءدىندى ۇستانادى.

بۇل يسلامشىلاردىڭ يراك پەن سيريا اۋماعىندا تۇراتىن باسقا ءدىني كونفەسسيالاردىڭ وكىلدەرىن جاپپاي قىرعىنعا ۇشىراتقان ءبىرىنشى وقيعا ەمەس. سۋننيتتەر سۋننيزمعا كوشۋدى نەمەسە ەلدەن كوشۋدى تالاپ ەتكەن، كونبەگەن جاعدايدا تۇرعىنداردى ولتىرەمىز دەپ قورقىتقان.