بيىل بەيبارىس سۇلتاننىڭ 800 جىلدىعى اتالىپ وتەدى - ۇكىمەت
20:45, 20 - قاڭتار 2023
استانا. قازاقپارات – ق ر پرەمەر-ءمينيسترىنىڭ ورىنباسارى التاي كولگىنوۆ بيىلعى اتاۋلى داتالار جايىندا ايتتى، دەپ حابارلايدى قازاقپارات ءتىلشىسى.
«بىلتىر عۇلاما عالىم، الاش قايراتكەرى احمەت بايتۇرسىن ۇلىنىڭ 150 جىلدىعى، زاڭعار جازۋشىمىز مۇحتار اۋەزوۆتىڭ 125 جىلدىعى مەملەكەتتىك دەڭگەيدە اتالىپ ءوتتى. وسى ءداستۇردى جالعاستىرا وتىرىپ، 2023-جىلعى اتاۋلى داتالاردى جوعارى دەڭگەيدە ۇيىمداستىرۋىمىز قاجەت»، - دەدى ا. كولگىنوۆ مادەنيەت مينيسترلىگىنىڭ القا ماجىلىسىندە.
وسى ورايدا ول بيىلعى اتاۋلى داتالار جايىندا اتاپ ءوتتى.
«بيىل داڭقتى بابامىز، ۇلى قولباسشىسى بەيبارىس سۇلتاننىڭ 800 جىلدىعىن، كورنەكتى مەملەكەت قايراتكەرى، ونەر سالاسىنىڭ دامۋىنا ولشەۋسىز ۇلەس قوسقان تەمىربەك جۇرگەنوۆتىڭ 125 جىلدىعىن اتاپ وتەمىز»، - دەدى ۇكىمەت باسشىسىنىڭ ورىنباسارى.
ايتا كەتەيىك، سەناتور نۇرتورە ءجۇسىپ وسىعان دەيىن ۇكىمەتتى بەيبارىس سۇلتاننىڭ 800 جىلدىعىن جوعارى مازمۇندى دەڭگەيدە وتكىزۋگە شاقىرعان بولاتىن.